संविधान सभाको म्याद थप्नुहुँदैनः कानूनब्यवसायी

काठमाडौं ११ जेठ । कानुन व्यवसायी चौतारी नेपालका पदाधिकारीहरुले नेपाली जनताको नाममा दलगत स्वार्थका लागि संविधानसभाको म्याद थप्नु कानुन विपरित हुने बताएका छन् । आज रिपोर्टर्स क्वल नेपालमा पत्रकार सम्मेलन गर्दै उनीहरुले जनताले दिएको समयसी र १ वर्ष थप गर्दा पनि नेताहरुको असक्षताका कारण फेरी पनि संविधानसभाको म्याद थप्न खोज्नु सत्ता प्राप्तिका लागि वार्गेनिङ गर्ने थलो बनाउन खोजिएको आरोप लगाए ।

पत्रकार सम्मेलनमा बोल्दै अध्यक्ष इश्वरी चन्द्र शर्माले भने – दलहरुले संविधान सभाबाटै जनताको संविधान दिन सक्नुपथ्र्यो दिन सकेनन्, अब थारो संविधान सभा नेपाली जनताको चाहनाको विषय होईन, अव नयाँ जनादेशमा जानुको विकल्प छैन । शर्माले म्याद सकिएको औषधिले काम नगर्ने हुँदा अस्तित्व समाप्त भएका दलका नेताहरुले थपिएको म्यादभित्र संविधान दिन नसक्ने ठोकुवा गरे । अध्यक्ष शर्माले भने– सर्वोच्च अदालतको फैसलाले संविधान जारी हुने भनी गरेको अपेक्षा पटक–पटक म्याद थपेर मात्र जारी हुने भनेको होईन, त्यसको परिसीमा भुल्नु नत कानुन सम्मत हुन्छ नत बौद्धिक ।

कार्यक्रममा कानुन व्यवसायी चौतारी नेपालका महासचिव नारायण प्रसाद दुवाडीले संविधान सभाको अस्तित्व कानुनद्वारा सृजित र नियन्त्रित रहेको हुँदा दलगत स्वार्थका लागि नेताहरुले आफै धामी, आफै बोक्सीको रुप धारणा गरेको आरोप लगाए । उनले भने– जनताले नेताहरुलाई खबरदारी नगर्ने हो भने उनीहरु निरंकुशतावादी हुने र नेपाली जनताको नयाँ नेपालको परिकल्पना छायाँ पर्ने छ ।

महासचिव दुवाडीले भने –सार्वभौमसत्ता सम्पन्न नेपाली जनता हुन्, म्याद सकिएपछि पनि नयाँ जनादेशको लागि नजानु, निर्विकल्पको कुरा गर्नु जडसूत्रवादी सोच हो ।