आशिष पत्रकारीता पुरस्कार रमेश समदर्शी को पोल्टामा

मेची अञ्चलमा प्रत्येक वर्ष प्रदान गरिँदै आएको आशिष पत्रकारीता पुरस्कारबाट झापाका पत्रकार रमेश समदर्शी पुरस्कृत हुनुभएको छ । इलामका युवा पत्रकार स्वर्गीय आशिष राईको स्मृतिमा स्थापना गरिएको पत्रकारीता पुरस्कारबाट झापामा सक्रिय युवा पत्रकार रमेश समदर्शी पुरस्कृत हुनु भएको हो ।

आज एक कार्यक्रमका बिच प्रमुख जिल्ला अधिकारी कोषहरी निरौलाले पुरस्कृत पत्रकार राईलाई दोसल्ला र नगद पाँच हजार एक रुपैयाँ नगद प्रदान गर्नुभएको हो । आशिष स्मृति पत्रकारीता पुरस्कार कोषका संयोजक कार्यक्रममा डाक्टर देवी क्षेत्री दुलालको अध्यक्षतामा सम्पन्न पुरस्कार वितरण कार्यक्रममा बोल्दै प्रमुख जिल्ला अधिकारी निरौलाले प्रेस स्वतन्त्रताका लागि सबैले सहयोग गर्नुपर्ने बताउनुभयो । कार्यक्रमका अधिकाँश वक्ताहरुले अबका पत्रकारहरुले व्यवसायिक पत्रकारिता गर्नुपर्ने बताए ।

आशिष पत्रकारीता पुरस्कारबाट हालसम्म इलामका बेनुप भट्टराई, राजु सिवा, पाँचथरका गणेश साम्पाङ्ग, झापाका मोहन काजि र ताप्लेजुङ्गका आनन्द गौतम पुरस्कृत भइसकेका छन् ।

२०६० सालमा स्थापना भएको पुरस्कारको राशी ५ हजार १ रुपैयाँ र प्रमाणपत्र रहेको छ । रेडियो नेपालका तत्कालिन समाचारदाता आशिष राईको २०५९ साल बैशाख एक गते नयाँबर्ष मनाउने क्रममा राजदुवाल) (माईखोला) मा डुबेर निधन भएको थियो । राईको निधनपछि आशिष पत्रकारीता पुरस्कार कोष स्थापना गरिएको थियो ।

आषिश पत्रकारीता पुरस्कारबाट प्रत्येक वर्ष मेची अञ्चलका एक जना सक्रिय पत्रकारलाई पुरस्कृत गरिंदै आएको छ । प्रत्येक वर्ष बैशाख एक गते प्रदान गरिंदै आएको पुरस्कार नेपाल पत्रकार महासंघ इलाम शाखाका अध्यक्ष उमेश गुरुङ्गलाई एकैपटक पत्नि र मातृ शोक परेकाले बैशाख १५ गते मात्र प्रदान गरिएको हो ।

Via Source:- Purbeli Times