अंह म नेता हुन्न

चिया दोकानमा दिनभर बस्ने

गफाडीको बिषय बन्न,

च्याउ जस्तै उम्रिएका एफएम रेडियोमा

घन्टौ पिच्छे आउने समाचारको प्रमुख प्रशंग बन्न,

देश र जनताको लागि केहि गर्न नसक्ने

एउटा नाचार र घृणाको पात्र बन्न,

पन्ध्र घण्टाको लोडसेडिंग पछी खुलेको

टेलिभिजनको समाचारमा,

भोकाएका हरिया झिंगा जस्तै

तछाडमछाड गरिरहेका पत्रकारको माझमा,

देखिने

एउटा गन्हाएको सिनो बन्न,

अंह म नेता हुन्न / 

सरकारी गाडी चढेर

सांसद्को पोसाक पहिरेर,

गलामा फुलको माला लगाएर

हजारौ सहभागी भएको सभाको मन्चमा,

एउटा साधारण व्यक्तिको झापड खान 

अंह म नेता हुन्न //

आँखामा कालो चस्मा 

र

टाउकामा ढाका टोपी ढलकाउदै

सिधा साधा जनतालाइ खोक्रो आश्वासन देखाउदै,

कम्मर कसेर

सिंहदरबार पसेर,

टेबल ठटाउदै

एक तिरस्कृत  भ्रस्टचारी मन्त्रि बन्न

अंह म नेता हुन्न ///

                                                                                                योगेश अधिकारी 

                     धरमपुर-४, झापा 

                     हाल- जी. फोर.एस. कतार