पूर्वाञ्चलको सर्वाधिक राशीको अक्षयकोष झापामा स्थापना

झापा, ५ वैशाख

पूर्वाञ्चलमा सर्वाधिक राशिको अक्षयकोष स्थापना भएको छ । झापाको रुद्र-गौरी श्री-अम्बिका प्रतिष्ठानका लागि प्रतिष्ठानका संरक्षक श्रीप्रसाद ओलीले एक करोड रुपैयाँ राशिको अक्षय कोष स्थापना गरेका हुन् ।

झापा सुरुङका स्थायी बासिन्दा ८० वषर्ीय श्रीप्रसाद पूर्वाञ्चलका अग्रणी समाजसेवीमा गनिन्छन् । झापाको विर्तामोडमा आइतबार आयोजित समारोहमा प्रतिष्ठानले कोषको घोषणा गर्दै वाषिर्क रूपमा प्राप्त हुने ब्याजले विभिन्न चार विधाका व्यक्तित्वलाई पुरस्कृत गरिने जनाएको छ । शैक्षिक, सामाजिक र धार्मिक क्षेत्रमा योगदान दिएका उनले आफैँ संरक्षक रहेको प्रतिष्ठान दर्ता गरेर सो रकम उपलब्ध गराएका हुन् । 'सिर्जनामा लागेका व्यक्तिलाई हौसला मिलोस् भन्ने उद्देश्य राखेर प्रतिष्ठानका लागि एक करोड रुपैयाँ दिने निर्णय गरेँ,' आइतबार अक्षय कोष घोषणसभामा उनले भने, 'मैले जे सकँे त्यो गरेँ, बाँकी अरूकै जिम्मामा छ ।' प्रतिष्ठानका अध्यक्ष गंगाप्रसाद ओलीका अनुसार, अक्षय कोषबाट प्राप्त ब्याज रकमले प्रत्येक वर्षको वैशाख ४ गते विभिन्न चार विधाका व्यक्तित्वलाई पुरस्कृत गरिनेछ ।

प्रतिष्ठानले रुद्रप्रसाद ओली स्मृति कृषि पुरस्कार, गौरादेवी ओली स्मृति आदर्श आमा पुरस्कार, अम्बिकादेवी ओली स्मृति पत्रकारिता तथा साहित्य पुरस्कार र देवी ओली स्मृति बाल पुरस्कार स्थापना गरेको छ । तीमध्ये बाल पुरस्कारको राशि ५१ हजार एक सय ११ रुपैयाँ रहेको छ । अन्य पुरस्कारको राशि एक लाख एक हजार एक सय ११ रुपैयाँ रहेको प्रतिष्ठानका सचिव यज्ञराज ओलीले जानकारी दिए ।

प्रत्येक वर्ष प्रतिष्ठानद्वारा निर्धारित क्षेत्रमा नेपालभरिबाट योगदान पुर्‍याउने व्यक्तिलाई पुरस्कृत गर्नेगरी ती पुरस्कार घोषणा गरिएका हुन् । प्रतिभा छनोटका लागि विशेषज्ञसहितको समिति गठन गर्ने व्यवस्था गरिएको छ । प्रतिष्ठानले वृद्धवृद्धा र समाजका असहाय तथा दैवी विपत्तिमा परेकालाई पनि सहयोग गरिने जनाएको छ ।

Via Source:- nayapatrika