१२ वर्षमा पनि सञ्चालन भएन बसपार्क

पाँचथर, माघ - 

सदरमुकामनजिक स्थानीयले जग्गा उपलब्ध गराएको १५ वर्ष बितिसक्दा पनि फिदिम-२ पल्लोटारमा बसपार्क सञ्चालनमा आउन सकेको छैन । सरकारले लामो समयसम्म चासो नदेखाएको भन्दै स्थानीय बासिन्दाले तत्काल सञ्चालन गर्न माग गरेका छन् । 

झापाको काँकडभिट्टामा रहेको अव्यवस्थित बसपार्क । केही समयअगाडीदेखि मेचीनगर ११ मा नयाँ बसपार्क
 बनाउने भनेर जग्गा लिएतापनि त्यो जग्गा अहिले गौचरणमा परिणत भएको छ ।
तस्विर सौजन्य मेचीनगर झापाली फेसबुक समूह

फिदिमबजारको खेलमैदानदेखि जोरसालसम्म सडक निर्माण सुरु भएपछि पल्लोटारका स्थानीयले बसपार्कका लागि १० रोपनीभन्दा बढी जग्गा निःशुल्क प्रदान गरेका थिए तर न्यून बजेटका कारण उक्त जमिन प्रयोगमा आउन सकेको छैन । 

बसपार्क बन्ने भएपछि स्थानीय नरबहादुर लावती, खगेन्द्र अर्याल, भवनाथ बाँस्कोटा, काजीमान लावती, प्रदीप बाँस्कोटा, वरपति अधिकारी, ज्ञानबहादुर दाहालसहित १० जनाभन्दा बढीले उक्त जग्गा प्रदान गरेका हुन् । स्थानीयले ०५६ सालमा नगर विकास समितिलाई पास गरिदिएको १० रोपनी जग्गाको हालको मूल्य पाँच करोडभन्दा बढी पर्छ । 

बसपार्क व्यवस्थापनका लागि न्यून बजेट निकासा हुने गरेकै कारण समयमा सञ्चालनमा ल्याउन नसकेको निर्माण समितिका पूर्वअध्यक्ष कमल बाँस्कोटाले बताए । उनका अनुसार नगर विकास समितिको नाममा जग्गा आएपछि सरकारले तीन वर्ष १२ लाख लगानी गरे पनि त्यसपछि रकम निरन्तरता हुन सकेको छैन । 

आवास डिभिजनमार्फत् गत वर्ष आएको दुई लाखले पानी तर्काउने नाली बनाइएको थियो । यसअघिको बजेटले बसपार्कमा पर्खाल लगाउने र माटो सम्याउने काम भएको थियो । 

नगर विकास समितिले नक्सा पास र स्टिमेट गरी काम थाले पनि रकम अभावले काममा ढिलाइ भएको हो । माटो सम्याउने, वाल, नाली, सडक, कालोपत्रे -बसपार्क क्षेत्रमा), ड्रेन, सुरक्षा र बुकिङ पोस्टका लागि एक करोडभन्दा बढी बजेट लाग्ने अनुमान गरी काम थालिएको थियो । 

 बसपार्क सञ्चालन हुन नसकेपछि बजारको माथिल्लो क्षेत्रमा बसस्टेन्ड राखिए पनि सबै गाडीहरू मुख्य चोकमै रहने गरेकाले ट्राफिक व्यवस्थापन मिलाउन कठिनाइ भएको ट्राफिक प्रहरीका हवल्दार गर्जबहादुर राईले बताए । 

बसपार्क सञ्चालनका लागि जग्गाबाहेकका अन्य पूर्वाधार नभए पनि मेची राजमार्गसँगै बसपार्कसम्मको एक हजार छ सय मिटर सडकमा कालोपत्रेको काम भइरहेको छ । तत्काल बसपार्क सञ्चालन गरी पूर्वाधार र जोरसालसम्मको एक हजार छ सय मिटर सडक कालोपत्रे गरिए सदरमुकामको ट्राफिक अव्यवस्था हट्ने र उक्त मार्ग फिदिमदेखि जोरसाल निस्कने वैकल्पिक मार्ग बन्ने स्थानीय बासिन्दाको भनाइ छ ।

लवदेव ढुङ्गानाको रिपोर्ट ई-कान्तिपुर बाट