'देली बेली'को सम्पादित प्रिन्ट नेपाली बजारमा

प्रयुक्त शब्द र दृश्यले विवादित बलिउड चलचित्र 'देली बेली'को सम्पादित प्रीन्ट सोमबार दिउँसो नेपाल आइपुगेको छ । भारतीय सेन्सर बोर्ड स्वयमले पुनः सम्पादन गरी चलचित्रको सम्पादित संस्करण काठमाडौं पठाएको हो । दिउँसो एक बजे इन्डियन एयरलाइन्सको उडानबाट क्यूव वितरकको प्रीन्ट आइपुग्यो भने यूएफओको मंगलबार बिहान आइपुग्नेछ ।
'देली बेली'को सम्पादित भस्रनमा अश्लील (एब्यूजिव वर्डस्)हरु हटाइएको प्रदर्शक नकिम उद्दिनले बताए । यतिबेला वितरकहरु सम्पादित भस्रनबाटै चलचित्र चलाउनका लागि जिल्ला प्रशासन कार्यालय काठमाडौंको निर्णयको पर्खाइमा छन् । सेन्सर बोर्डले सम्पादित चलचित्र चलाउन वितरकहरुलाई जिम्मा दिइसकेको अवस्था हो सदस्य चेतन सापकोटाले मेरोसिनेमासँग भने चलचित्र चलाउने नचलाउने कुरा प्रशासनको निर्णयमा निर्भर हुनेछ ।
सोमबार पनि प्रमुख जिल्ला अधिकारी लक्ष्मीप्रसाद ढकालले 'देली बेली' चलाउने सबै वितरकलाई कार्यालयमा डाकेर बुझेका थिए । वितरकहरुले गल्ती नदोहोर्‍याउने सर्तमा एकपटकलाई आममाफी दिन सीडीओलाई अनुरोध गरेका थिए । बोर्ड सदस्य सापकोटाले नेपालीको लगानी परेको चलचित्रलाई डुब्न नदिन एक पटक आममाफीका लागि प्रशासनलाई आग्रह गरिने बताए । यसबारे मंगलबार बिहान बस्ने प्रशासन, सेन्सर बोर्ड र वितरकबीचको त्रिपक्षीय वार्ताले निर्णय गर्ने भएको छ । प्रशासनले घटनाबारे अनुसन्धान गरिरहेको छ । घटनामा दोषी पाइए नछाड्ने सीडीओको भनाई उध्दृत गर्दै सापकोटाले बताए । क्यूबलॆ झन्डै तीस लाखमा 'देली बेली' किनेको बुझिएको छ ।

के छ नयाँ भर्सनमा ?
प्रशासनको निर्णयपछि पुनः प्रदर्शन हुने आशा गरिएको 'देली बेली'को नयाँ संस्करणमा अश्लिल र अब्युजिव शब्दहरु हटाइएको छ । दृश्यमा कुनैपनि परिवर्तन गरिएको छैन । खासगरी किशोर र युवाले दैनिक बोलिचालीमा प्रयोग गर्ने स्ल्याङ वर्डस्हरु फिल्ममा थिए । भद्दा लाग्ने दृश्यहरु नहटाइनुको पछाडि चलचित्रको मर्म नै बांगिने हो कि भन्ने भय कारण छ ।