बाढीको जोखिममा हडिया पुल

काँकडभिट्टा, अषाढ २७ -

भरखरै निर्माण सम्पन्न झापाको ज्यामिरगढी र सदरमुकाम चन्द्रगढी जोड्ने हडिया खोलाको पुल जोखिममा परेको छ । पुल वरपरको क्षेत्रमा बाँध निर्माण नहुँदा बाढीले पुल भत्काउने खतरा बढेको हो ।
'समयमा रोकथाम नगरी पुललाई असर पुग्न सक्छ,' निर्माण समितिका अध्यक्ष तारावीर कट्वाल भन्छन्, 'दीर्घकालीन रोकथामको आवश्यकता छ ।' सरकारको २ करोड २१ लाखको लागतमा २०६५ सालदेखि थालिएको पुल निर्माण हालै सम्पन्न भएको छ ।
तर, हडिया खोलामा बाध नबनाइँदा पुल भत्कन सक्ने खतरा बढेको छ । पुलको पूर्व र पश्चिमको भाग वढी जोखिममा रहेको अध्यक्ष कट्वालको भनाइ छ । उनका अनुसार साउनको पहिलो साता प्रधानमन्त्रीले पुल उद्घाटन गर्ने कार्यक्रम छ ।
पुल निर्माणपछि झापाको धुलावारी हुँदै सदरमुकामसम्मको दुरी छोटिएको छ । हाल पुर्व पश्चिम राजमार्गको चारआली हुँदै सर्वसाधारण तथा पर्यटक सदरमुकाम पुग्नुपर्ने बाध्यता छ । तर, पुलको निर्माणपछि सोझै धुलावारी, ज्यामिरगढी हुँदै सदरमुकाम पुग्न सहज हुने छ ।
बाहुनडाँगी, शान्तिनगर, दक्षिणी इलामका अधिकांश गाविसका साथै भारतको पश्चिम वंगालका दार्जिलिङ सिलिगुडीलगायतका क्षेत्रबाट आउने सर्वसाधारणका लागि यो मार्ग उपयुक्त ठहरिने अध्यक्ष कटवाल बताउँछन् । उनका अनुसार अब करिब १७ किलोमिटर यात्रा छोटिने छ ।
Via Source:- पर्वत पोर्तेल/कान्तिपुर