२ दिनभित्र प्रधानमन्त्रीको राजिनमा र २ दिनभित्र १० बुँदे मागमा सहमति भए मात्रै संविधानसभाको म्याद थपः सुजाता

प्रधानमन्त्रीको राजिनमा आउँदैनः महासेठ, म्याद थप पहिला राष्ट्रिय सहमति आवश्यकः रायमाझी
काठमाडौ, ९ जेठ । नेपाली काग्रेसकी नेतृ सुजाता कोइरालाले आगामि दुई दिन भित्र प्रधानमन्त्रीको राजिनामा र ४ दिनभित्र काग्रेसले अगाडि सारेको १० बुँदे माग पुरा नभए कुनै पनि हालतमा संविधानसभाको म्याद नथपिने स्पष्ट पार्नुभएको छ । 

रिपोर्टर्स क्लब नेपालले सोमबार आयोजना गरेको साक्षात्कारमा कोइरालाले प्रधानमन्त्रीको राजिनामा र १० बुँदे माग संबोधनमा सत्तारुढ दलहरु तयार भए काग्रेस संविधानसभाको म्याद थप्न तयार रहेको बताउनुभयो ।
अघिल्लो पटक थपिएको संविधानसभाको एक वर्ष म्याद थपाई नै अबैध भएको दावी गर्दै कोइरालाले शान्ति र संविधान प्रक्रियालाई लम्ब्याएर जनताको रगत चुस्ने र माओवादीलाई पोस्ने काम काग्रेसकोलागी स्वीकार्य हुँदै नहुने ठोकुवा गर्नुभयो ।
सरकारले एकलौटी रुपमा संविधानसभाको म्याद थप्छु भन्नु दिवास्वप्न मात्रै भएको भन्दै उहाँले म्याद थपे माओवादीकोलागी मात्र प्रजातन्त्र रहने बताउनुभयो ।
कोइरालाले संविधानसभा विघठन हुँदैमा मुुलुकमा कुनै उत्पाद नहुने भन्दै संविधानसभा विघठन भएपछि सानो सर्वदलिय कमिटि गठन गरेर संविधान जारी गर्नु पर्ने बताउनुभयो । उहाँले संविधान सभा विघठन हुँदैमा मुलुकमा राष्ट्रपति शासन पनि नआउने स्पष्ट पार्नुभयो । उहाँले भन्नुभयो–संविधानमा राष्ट्रपतिको कुनै ब्यवस्था छैन ।
साक्षात्कारमा भौतिक योजना तथा निर्माण मन्त्री टोपबहादुर रायमाझीले सहमतिकोलागी प्रधानमन्त्री झलनाथ खनालको राजिनामा सहितको सबै विकल्प खुल्ला गरेर दलहरुले छलफल गर्नु पर्ने बताउनुभयो ।
संविधान सभाको म्याद थपको विषयमा विवाद कायम रहेकोमा चिन्ता प्रकट गर्दै मन्त्री रायमाझीले म्याद थप भन्दा पनि अहिले शान्ति, संविधान र सत्ता साझेदारीताको विषयमा राष्ट्रिय सहमति कायम गर्ने विषयमा बहस हुनु पर्ने आवश्यकता औल्याउनुभयो । उहाँले भन्नुभयो–म्याद थप भन्दा पहिला राष्ट्रिय सहमति कायम गरिनु पर्छ ।
राष्ट्रिय सहमति हुँदा जसको नेतृत्वमा सरकार बन्छ त्यसलाई सबैले स्विकार गर्नु पर्ने बताउनु भयो । उहाँले राष्ट्रिय सहमतिकोलागी सर्त राख्ने र बाधा गर्नेहरु जनताको दुश्मन र लोकतन्त्र विरोधी भएको पनि ठोकुवा गर्नुभयो ।
नेपाली जनताले संविधानसभाको विघठन भन्दा पनि समयमा संविधान बनाउन नसकेकोमा आक्रोस ब्यक्त गरेको भन्दै संविधानसभाबाटै संविधान जारी हुनु पर्ने धारणा राख्नु भयो । उहाँले संविधानसभा भंग गर्नु भनेको मुलुकमा पुन अधिनायकबाट लाद्नु भएको टिप्पणी गर्नुभयो ।
साक्षात्कारमा सिचाई मन्त्री रघुवीर महासेठले प्रधानमन्त्री को राजिनामा कुनै पनि हालतमा नआउँने भन्दै राजिनमाको माग पुर्वाग्रहमात्रै भएको दावी गर्नुभयो । उहाँले सरकारको राजिनामाले मुलुक पुन अन्यौलमा जाने बताउनुभयो ।
शान्ति र संविधानलाई निश्कर्समा पुर्याउने उद्देश्यका साथ प्रधानमन्त्री झलनाथ खनाल नेतृत्वको सरकार गठन भएको भन्दै त्यो उद्देश्य पुरा नभएसम्म अहिलेकै सरकार कायम रहने ठोकुवा गर्नुभयो । उहाँले भन्नुभयो–यो सरकार समय किटेर बनेको सरकार होईन । संविधान जारी गर्ने उद्देश्यका साथ बनेको हो । त्यसैले सो उद्देश्य पुरा नभएसम्म सरकार कायमै रहन्छ । त्यो भन्दा अघी आलोपालो पनि हुँदैन ।
शान्ति र संविधानकोलागी भए सहमति बन्ने सक्ने भन्दै उहाँले सत्ताकोलागी भए दलहरुवीच कुनै पनि हालतमा सहमति बन्न नसक्ने मन्त्री महासेठले ठोकुवा गर्नुभयो ।
यद्यपि उहाँले कस्तो संविधान बन्ने र शान्ति प्रक्रिया निश्कर्समा पुग्ने विषयमा दलहरुवीच ठोस र ईमान्दार सहमति भए प्रधानमन्त्रीको राजिनामा आउन सक्ने बताउनुभयो ।
संविधानसभाको म्याद सर्वसम्मतीबाटै थपिने दावी गर्दै उहाँले संबैधानिक ब्यवस्था अनुसार गर्नु पर्ने भए दुई तीहाई भन्दा पनि तीन तिहाई नै पुग्ने ठोकुवा गर्नुभयो ।
नेकपा एमालेले संविधानसभाको म्याद थप्ने निर्णय गर्ने दावी गर्दै पार्टी केन्द्रीय कमिटिको बैठक पछि एक भएर अगाडि बढने बताउनुभयो ।