अलैंची प्रतिमन सत्तरी हजार इतिहासमै रेकर्ड

झापा ५ पुष/ लगातार उच्च बजार भाउ पाइरहेको अलैंची सोमबार प्रतिमन सत्तरी हजार रुपैयाँमा विक्री भएको छ । यो इतिहासकै उच्च मूल्य हो । 

नेपाल अलैंची व्यवसायी संघका अनुसार सोमबार विर्तामोडमा सत्तरी हजार रुपैयाँ प्रतिमनका दरले अलैंची किनबेच भएको हो । पुच्छर नभएको, ठूलो दाना र सुख्खा अलैंची उच्च मूल्यमा विक्री भएको हो । मेची अञ्चलमा अलैंचीको व्यवसायीक कारोवार शुरु भएको साढे चार दशक नाघेको छ । गतवर्ष प्रतिमन ६० हजार रुपैयाँमा विक्री भएको अलैंचीले त्यसबेला रेकर्ड कायम गरेको थियो । तर यो मुल्यले इतिहासमै रेकर्ड बनाउन सफल भएको छ । 

पहाडी भूभागका किसानको आय अर्जानको मुख्य माध्यमको रुपमा रहेको अलैंचीलाई ‘खोल्साको सुन’ भनेर पनि चिनिने गर्दछ । यसले सुनलाई पनि विक्री मूल्यको इकाईको उछिनेको छ । 

इलाम, पाँचथर, ताप्लेजुङ, संखुवासभा, भोजपुर, धनकुटा, तेह्रथुम र सोलुखुम्बु नेपालका अलैंची उत्पादन हुने प्रमुख जिल्लाहरु हुन् । नेपालमा उत्पादित अलैंची भारत, पाकिस्तान र खाडी मुलुकहरुमा खपत हुँदै आएको छ । त्यसमा पनि भारत मुख्य बजार भएकाले त्यहाँको अस्थिर बजार प्रणालीले यहााँको बजार मूल्यलाई प्रभावित पार्दछ ।  

सम्भावना बढ्दै

वि.सं. २०१८ देखि २० सालबाट मेची अञ्चलको पहाडी जिल्लाका स्थानीयवासीले सिक्किमबाट विरुवा ल्याई रोपेको अलैंचीले अहिले भव्य व्यवसायीक रुप लिइसकेको छ । अलैंची खेतिको विकास र प्रवद्धनका लागि राज्यले कुनै सहयोग नगरेको गुनासो किसानको छ । यद्यपी एकल प्रयासमै भए पनि खेतीको सम्भावना जोगाउँदै लागिपरेको किसानले अहिले अलैंचीलाई विदेशी मुद्रा आर्जन गर्ने मुख्य माध्यम बनाइछाडेका छन् ।

आर्थिक वर्ष	निर्यात अलैचीको परिमाण केजीमा
2064/065	87,33,904
2065/066	98,87,445
2066/067	54,64,183