यो जमाना सिफारिसको ।

जागिरका लागि मात्र होइन छोराछोरीलाई राम्रो स्कुल भर्ना गर्न र नाम चलेका डाक्टरकहाँ परीक्षण गराउन पनि सिफारिस अनिवार्य भएको छ । सिफारिस भएन भने कि त महिनौँ दिन कुर्नुपर्छ कि त पहिलो रोजाइ छाड्नुपर्छ ।
व्यक्तिगत सम्बन्धको आधारमा हुने यस्तो सिफारिस प्रथाले समाजको कुनै पनि क्षेत्रलाई अछुतो राखेको छैन । समाजको ऐनाका रूपमा चित्रित चलचित्र क्षेत्रमा पनि अहिले सिफारिसको चलन बढ्दो छ । सिङ्गो नेपाली चलचित्र क्षेत्र यो रोगबाट नगाँजिए पनि केही कलाकारका कारण भने यो क्षेत्र सिफारिसमय बन्दै गएको छ ।

'गहिरो' मित्रता र व्यक्तिगत सम्बन्धको आधारमा निर्माता/निर्देशक/कलाकारले आ-आफ्नो मान्छेको सिफारिस गर्दै आएका छन् । कतिले दबाब पनि दिने गरेका छन् । सिफारिस अनुसारको कलाकार छनोट नभए चलचित्र नै बहिष्कारसम्म गरिन्छ यहाँ ।
चल्तीका नायक विराज भट्टले आफू निकटकी नवनायिका जेनिसा केसीलाई सिफारिस अनुसार चलचित्रमा नलिँदा चलचित्र नै छोडेको गाइँगुइँ अझैसम्म सेलाएको छैन । गत वर्ष एक दर्जन चलचित्रमा अभिनय गरेका विवाहित विराजले आफूलाई अनुबन्ध गरिएको चलचित्रमा जेनिसाको नाम सिफारिस गर्दै आएका छन् । बिकाउ हिरो भएपछि कि त उनको कुरा सुन्नु पर्छ होइन भने उनलाई छोडेर अर्कोलाई लिनु पर्छ । जानकारहरू भन्छन्, चल्तीको हिरो नलिने आँट कसले गर्छ र ?
सञ्चितासँग बिहे गर्नुअघि अर्का व्यस्त नायक निखिल उप्रेतीले उनको नाम निर्माता/निर्देशकसँग सिफारिस गर्थे । सिफारिस गर्नमा कामुक नायिका रेखा थापा अग्रस्थानमा पर्छिन् । सुरुमा विराज भट्टलाई सिफारिस गर्दै हिँड्ने रेखाले बीचमा आर्यन सिग्देल र अहिले आयुष रिजालको नाम सिफारिस गर्छिन् । चलचित्र हिफाजतपछि रेखाले आयुषलाई सिफारिस गर्न थालेकी हुन् । आफू निर्मित चलचित्र मात्र होइन आफू अभिनित अन्य चलचित्रमा पनि उनले आयुषको नाम सिफारिस गर्छिन् । कलाकार मात्र होइन निर्देशक पनि सिफारिस गर्न पछि छैनन् । चलचित्रको कमान सम्हाल्ने निर्देशकले चलचित्रको स्त्रिmप्ट अनुसार कलाकार छनोट गर्ने मान्यता विश्वव्यापी रूपमा रहेको छ । तर नेपालमा भने स्त्रिmप्ट होइन 'अन्तरङ्ग' सम्बन्ध र लिनेदिने परम्परका आधारमा कलाकार छनोट गरिन्छ ।
निर्देशक दीपक श्रेष्ठले आफ्ना प्रायः चलचित्रमा नायिका युना उप्रेतीलाई छनोट गर्छन् । यति मात्र होइन आफ्ना निकटका निर्देशकलाई पनि युनाको नाम सिफारिस गर्छन् । चलचित्र 'हो यही माया हो'का लागि दीपकले युनाको नाम सिफारिस गरे पनि पछि उनको नाम चलचित्रबाट हटाइएको घटना अझै ताजा छ । अर्का निर्देशक नरेश पौड्यालले आफू निर्देशित प्रायः चलचित्रमा नायिका अरुणिमा लम्साललाई दोहोर्‍याउँछन् ।
यसैगरी निर्माता/निर्देशक सोभित बस्नेत, निर्माता वसन्तकुमार श्रेष्ठ, चिरञ्जीवी बस्नेत, रोज राणा, वितरक कृष्ण कार्की, सुनिल मानन्धरले पनि आफू नजिकका नायिकाको नाम सिफारिस गर्दै आएका छन् । सोभितको चलचित्रमा प्रायः रेजिना उप्रेती देखापर्छिन् भने निर्माता वसन्तकुमार श्रेष्ठको चलचित्रमा नायिका नन्दिता केसी देखिँदै आएकी छन् । वितरक कृष्ण कार्कीले नायिका सोनिया केसीलाई चलचित्रहरूमा सिफारिस गर्दै हिँड्छन् । नेपाली चलचित्रमा वितरक र हलमालिकको बोलवाला रहेकाले कृष्णको सिफारिस निर्माताले काट्ने कुरै छैन । अर्का निर्माता/वितरक सुनिल मानन्धर नायिका अर्पणा सिंहको सिफारिस गर्दै हिँड्छन् । यी बाहेक अन्यले पनि आफू निकटका कलाकारको नाम सिफारिस गर्ने गरेका छन् । भारतीय चलचित्र क्षेत्रमा भने सिफारिस प्रथाले कम प्रश्रय पाउने गरेको देखिन्छ । परिवारवाद हावी भए पनि कथा अनुसारको कलाकार छनोट गर्ने चलन बलिउडमा रहेकेा छ । 

Via Source:- Filmykhabar