होसियार !! मसाज केन्द्रका घरमालिक

पर्यटकीय क्षेत्र ठमेल अवैध मसाज पार्लरका कारण बदनाम भएको भन्दै प्रहरीले त्यस्ता मसाज सञ्चालन गर्न दिने घरमालिकलाई पनि कारबाही गर्ने अभियान थालेको छ । सो क्षेत्रमा अवैध मसाल पार्लरको सङ्ख्या अत्यधिक बढ्नुमा त्यस क्षेत्रका घरमालिक प्रमुख जिम्मेवार देखिएको सोह्रखुट्टे महानगरीय प्रहरी प्रभागका प्रहरी निरीक्षक शिवबहादुर सिंहले अभियानलाई बताए । उनले भने, 'सम्बन्धित निकायमा दर्ता नभई सञ्चालित मसाज पार्लर बसेका घरका मालिकलाई कारबाही गर्ने अभियान थालिएको छ ।’

ठमेल क्षेत्रमा १ सय ५० भन्दा बढी मसाज पार्लर सञ्चालन भएकामा ७५ ओटामात्र सम्बन्धित वडा कार्यालय वा नगरपालिकामा दर्ता भएका छन् । दर्ता नभई मसाज पार्लर सञ्चालन गर्न दिने घरमालिकको नाम सङ्कलन गर्ने कार्य भइरहेको प्रहरीले बताएको छ । प्रहरी निरीक्षक सिंहका अनुसार शुरूमा सचेत बनाउन पर्चा, पम्फलेट र माइकिङ गरी दर्ता नगरी मसाज पार्लर सञ्चालन नगर्न र दर्ता नभएकालाई घरभाडामा नदिन घरधनीलाई अनुरोध गर्ने र अटेर गरेमा सञ्चालक र घरमालिक दुवैलाई कारबाही गरिनेछ । मसाजका नाममा हुने अनैतिक कामलाई पूर्ण रूपमा हटाई ठमेललाई नमूना पर्यटकीय क्षेत्र बनाउनका लागि सो कार्य थालिएको हो । त्यस कार्यमा प्रहरी, प्रशासन, पर्यटकीय सङ्घसंस्था तथा नगरपालिका लागिरहेको सबै सक्रियताका साथ लागिरहेको बताइएको छ । मसाजका नाममा भइरहेको बढ्दो यौन व्यवसायलाई नियन्त्रण गर्न यो प्रयास प्रभावकारी हुने प्रहरीको भनाइ छ ।

अभियानका क्रममा पछिल्लो डेढ महीनामा १ सय २० जना मसाज व्यवसायी तथा अवैध कार्यमा संलग्न हुनेहरूलाई पक्राउ गरी कारबाही गरिएको सोह्रखुट्टे प्रहरीले बताएको छ । 'महँगो भाडाको लोभमा घरमालिकहरूले केका लागि घर भाडामा लिएको भन्नेतिर वास्ता नगर्ने गरेको देखिएको छ’, प्रहरीले भने, त्यसैले मुख्यतः घरमालिकलाई पछिल्लो समयमा निगरानी गर्न थालिएको हो ।’ अभियान शुरू भएपछि ठमेलमा ९५ प्रतिशत सुधार देखिएको पनि प्रहरी निरीक्षक सिंहले दाबी गरे । मसाज व्यवसायलाई मर्यादित र व्यावसायिक बनाउन प्रहरी, प्रशासन, ठमेलका मसाज व्यवसायी, घरमालिक, नगरपालिका, नेपाल पर्यटन बोर्डलगायतको संयुक्त पहलमा मसाज व्यवसायीका लागि आचारसंहिता बनाउने कामसमेत भएको बताइएको छ । आचारसंहिता लागू नगर्ने व्यवसायीमा कारबाहीमा पर्ने प्रहरीको भनाइ छ ।

ठमेल क्षेत्रमा सीसीटीभीको व्यवस्थासँगै प्रहरी निगरानी बढ्न थालेपछि पछिल्लो ३ महीनामा १५ जना मसाज व्यवसायी व्यवसाय छाडी भागेको मसाज व्यवसायी सङ्घले बताएको छ । सङ्घका उपाध्यक्ष राजेन्द्र श्रेष्ठका अनुसार व्यावसायिक रूपमा राम्रो किसिमले काम गरिरहेका मसाज व्यावसायीलाई केही नराम्रो गतिविधि गर्नेले बदनाम गराएका छन् । त्यसैले मसाज व्यवसायको वर्गीकरण गर्न जरुरी भएको उनको भनाइ छ । 'जथाभावी रूपमा मसाज पार्लरमा मारिने छापामा निर्दोष व्यक्तिसमेत पर्ने भएकोले सम्पूर्ण मसाज व्यवसाय नै आतङ्कित छ', उनले अभियानलाई बताए । मसाज व्यवसायी सङ्घले अवैध ढङ्गबाट सञ्चालित मसाज पार्लरविरुद्ध गरिने जुनसुकै कारबाहीमा सङ्घले सहयोग गर्नेसमेत स्पष्ट पारेको छ ।