माइक्रोबसमा आगजनीपछि धनकुटा तनाबग्रस्त

धनकुटा, माघ २२ - संघीय लोकतान्त्रिक मञ्चसम्वद्ध संघीय लिम्बुवान राज्य परिषद्ले अहृवान गरेको वन्दमा गाडी चलाएको भन्दै माइक्रोवस जलाईदिएपछि आक्रोशित स्थानीयवासी प्रतिकारमा उत्रिएका कारण शनिवार अपरान्हदेखि सदरमुकाम क्षेत्र तनाबग्रस्त बनेको छ ।

परिषद्ले धनकुटा जिल्ला अनिश्चितकालीन वन्दको आहृवान गरेपनि सवारी साधन सञ्चालनमा थिए । दिउँसो साढे एक बजे धरानबाट हिलेतर्फ आईरहेको को१ख २८५० नम्बरको माइक्रो धनकुटा ४ देब्रेबासस्थित स्कुलडाँडाको घुम्तीमा रोकेर परिषद्का कार्यकर्ताले आगजनी गरेको प्रत्यक्षदर्शीले जनाएका छन् । ७, ८ जनाको समुहले वसका चालक समिर लिम्बुलाई खुकुरी देखाई माइक्रो बस नियन्त्रणमा लिइ मट्टतेल छर्किएर आगो लगाईदिएको वसका सहचालक निमा तामाङले वताए ।

सहचालक तामाङका अनुसार सडक छेउ लुकेर वसेका आन्दोलनकारीहरुले एक्कासी वस रोकी चालक लिम्बुलाई बन्दमा किन चलाएको भन्दै खुकुरी देखाएका थिए । २२ जना यात्रु लिएर आएको सो माइक्रोवसका कुनै पनि सदस्यलाई गाडीवाट नओराली आगो लगाईदिएका थिए । यात्रुहरु अगाडीको ढोकावाट हाम फालेर ज्यान जोगाउन सफल भएको सहचालक तामाङले बताए । हामफाल्ने क्रममा केही यात्र’ सामान्य घाइते भएका छन् । माइक्रोमा भएको कुनै पनि सामान जोगाउन नसकेको उनले वताए ।