गैरकानुनी मदिरा उत्पादन तीव्र

सुब्रत न्यौपाने, झापा, २८ मंसिर
प्रभावकारी अनुगमनको अभावमा झापाका ग्रामीण क्षेत्रमा मदिराको गैरकानुनी उत्पादन तीव्र हुदै गएको छ । अवैध रूपमा कारखाना खोलेर मदिरा उत्पादन गर्ने क्रम केही वर्षयता बढेर गएको हो । उत्पादित मदिरा पूर्वी नेपालका विभिन्न जिल्लामा बिक्री हुन्छ ।
मदिराको उत्पादन तथा बिक्री-वितरणका लागि पूरा गर्नुपर्ने मापदण्डविपरीत खुलेका कारखाना सञ्चालनमा रोक लगाउन सरकारी निकायले प्रभावकारी पहल नगर्दा जिल्लामा मदिराको गैरकानुनी उत्पादन बढ्दै गएको हो । प्रहरी प्रशासनकै संरक्षणमा नक्कली मदिरा उत्पादन हुने गरेको स्रोतको दाबी छ ।
'अवैध रूपमा सञ्चालनमा ल्याइएका कारखानाका विषयमा प्रहरी बेखबर छैन,' स्रोतले नयाँ पत्रिकासँग भन्यो, 'मदिरा उत्पादन र बिक्रीका लागि छुट दिएबापत हुने नियमित आम्दानी गुमाउन नचाहने प्रहरी प्रवृत्तिका कारण मदिराको गैरकानुनी उत्पादन र कारोबार बढेको हो ।' स्रोतका अनुसार कारोबारमा छुट दिएबापत प्रहरीले मासिक दुई लाख रुपैयाँ प्राप्त गर्छ । जनपद प्रहरीले नजराना लिएर छोडिदिएको मदिरा सशस्त्र प्रहरीले बरामद गर्ने गरेकाले सुरक्षा अधिकारीबीच मनमुटाबसमेत हुने गरेको छ । सशस्त्र प्रहरी बल पाथिभरा गणका अनुसार सार्वजनिक सवारीका साधनमा राखेर जिल्ला बाहिरका बजारमा पठाउन लागिएको हजारौँ बोतल नक्कली मदिरा बरामद गरिएको छ । सुराकीका आधारमा सवारी चेकजाँच गर्दा त्यस्ता मदिरा फेला पर्ने गरेका छन् ।

झापाको मेचीनगरस्थित खयरडाँगी र नजिकैको ज्यामिरगढी गाविसमा मात्रै दुई दर्जनभन्दा बढी मदिरा कारखाना सञ्चालनमा छन् । सो क्षेत्रबाट प्रत्येक दिन विभिन्न ब्रान्डका ५० कार्टुनभन्दा बढी नक्कली मदिरा बजारमा पठाइने गरेको छ । यसबाहेक राजगढ, शनिश्चरे, शान्तिनगर, धाइजन, दुहागढी, धरमपुर, महेशपुर गौरीगन्जलगायतका गाविसमा पनि मदिराको अवैध उत्पादन हुन्छ । ती कारखानाले सक्कली मदिराकै रूप र रंगमा आफ्नो उत्पादनको बजारीकरण गरिरहेका छन् । नियमित सेवनकर्ताले समेत छुट्याउन नसक्ने गरी आन्तरिक राजस्व कार्यालयको अन्तशुल्क टिकट र आन्तरिक राजस्व विभागको स्टिकर टाँसेर नक्कली मदिरा बजारसम्म पुर्‍याइने गरिएको छ । नक्कलीमा पनि अन्तशुल्क टिकट पाइएकाले सहजै छुट्याउन मुस्किल पर्ने आन्तरिक राजस्व कार्यालय झापाका प्रमुख कृष्णप्रसाद पराजुलीले बताए । ल्याबमा परीक्षण गरेपछि मात्र ती स्टिकर नक्कली र सक्कली छुट्याउन सकिन्छ ।

उत्पादन र बिक्री-वितरणमा संलग्नले पक्राउपछि दिएको बयानअनुसार भारतको कोलकातामा अन्तशुल्क टिकट छापिने गरेका छन् । ती टिकट छाप्न प्रतिगोटा २० पैसा लाग्छ । केही समयअघि पक्राउ परेका झापा मेचीनगर-१ खयरडाँगीका मेघनाथ भण्डारीको कारखानाबाट प्रहरीले ६ हजार ८ सय २१ थान आन्तरिक राजस्व कार्यालयको अन्तशुल्क टिकट र आन्तरिक राजस्व विभागको स्टिकर बरामद गरेको थियो । भण्डारीको कारखानाबाट ब्लाक ज्याकमा प्रयोग हुने चार हजार, गिलमेरीमा प्रयोग हुने पाँच हजार, ब्लुरिमन्डमा प्रयोग हुने १० हजार थान थप स्टिकर र सिलसहितको १५ हजार थान बिर्काे पनि बरामद गरिएका थिए । नक्कली रक्सी उत्पादनका लागि घरैमा सञ्चालित कारखानामा छापा मारेर भण्डारीलाई पक्राउ गरिएको थियो ।

प्रहरीसँगको लेनदेन विवाद नमिलेपछि पक्राउ परेका भण्डारीविरुद्ध दायर मुद्दामा जिल्ला अदालत झापाले १६ लाख रुपैयाँ जरिवाना र एक वर्षको कैद सजाय सुनाएको छ । त्यसलगत्तै झापा राजगढका बद्री निरौला अवैध रूपमा उत्पादित नक्कली मदिरासहित पक्राउ परेका छन् । उनीविरुद्ध पनि मुद्दा चलाउने तयारी भइरहेको छ । नक्कली मदिरा उत्पादनमा रेक्टी फाइड स्पि्रड प्रयोग हुने गरेको छ । स्रोतका अनुसार एक लिटर स्पि्रडबाट तीन लिटरसम्म नक्कली मदिरा उत्पादन हुन्छ । केमिकलको मात्रा मिलाउन उत्पादकले उत्पादित रक्सी चाखेर बजारसम्म पुर्‍याउने गरेका छन् । 'केमिकलको मात्रा नमिलेका कारण मदिरा सेवनले कतिपयको ज्यान जाने गरेको हो,' स्रोतले भन्यो, 'मदिराको रंग हेरेर पनि केमिकलको मात्रा घटीबढी हुन्छ ।'

 News Source : Nayapatrika