पीडित गाउँलेद्वारा सुरक्षा माग, सात विस्थापित

माओवादी लडाकुको कुटपिटपछि त्रासमा रहेका इलामको चुलाचुलीका बासिन्दाले सुरक्षाको माग राखेका छन् ।
आज दिउँसो घटनाबारे बुझ्ने पुगेको मानवअधिकारकर्मीहरुको टोलीसमक्ष गाउँलेले अझै त्रास रहेको भन्दै सुरक्षा माग गरेका हुन् ।

नेपाल मानवअधिकार संगठन र इन्सेकका प्रतिनिधिमण्डल गाउँमा पुग्दा पीडितका आफन्तले गाउँमा थप सुरक्षाकर्मीको व्यवस्था मिलाइदिन पहल गर्न आग्रह गरेको संगठनका केन्द्रीय सदस्य डा. केपी सुबेदीले बताउनु भयो ।
टोलीले घटनाको विषयमा लडाकुको प्रथम डिभिजन मुख्यालयका सहकमाण्डर रामबहादुर थापा ‘संग्राम’ सँग पनि छलफल गरेको छ ।
यता दमकमा बस्ने तय भएको सर्वपक्षीय छलफल आज पनि हुन नसकेको चुलाचुली गाविसका पूर्वअध्यक्ष ओमनारायण खनालले बताउनु भयो ।
चुलाचुलीमा सुरक्षाकर्मीको टोली घटना भएकै दिनदेखि परिचालित छ । आज जिल्ला प्रहरी कार्यालय इलामका प्रहरी नायब उपरिक्षक बिष्णु थापाको नेतृत्वमा जनपद प्रहरीको टोलीले घटनाको विषयमा थप अनुसन्धान गरेको छ ।

यसैबीच लडाकुद्वारा गाउँलेमाथि भएको कुटपिटको विरोध गर्दै लिम्वुवान राज्य परिषदको युवा दस्ता एलभी केन्द्रीय कमाण्डले विज्ञप्ति जारी गरेको छ । केन्द्रीय कमाण्डर फक्ताक्लुङले हस्ताक्षर गरेको सो विज्ञप्तिमा लडाकुको उक्त कार्यको घोर भर्त्सना गरेको जनाइएको छ । पिडितलाई तत्काल क्षतिपूर्तिको मागसमेत विज्ञप्तिमा गरिएको छ ।

७ विस्थापित
माओवादी लडाकुको चुलाचुलीस्थित प्रथम डिभिजनका लडाकुको त्रासका कारण इलाम चुलाचुली गाविस-१ का सात जना सर्वसाधारणहरू विस्थापित भएका छन् ।
यसरी विस्थापित भएकाहरूमा वडा नं. १ का ध्रुव लावती, देवी फागो, ज्ञानु लावती, हरिकुमार फागो, वादल फागो, जेन तुम्वाफो र रोशन फागो रहेका छन् ।
त्यस्तै चुलाचुलीका स्थानियवासिहरू पुनः माओवादी लडाकुले आक्रमण गर्न सक्ने डरले स्थानीय इमाटोलिङ्ग बोर्डिङ्ग स्कूलको चौरमा प्रहरीको निगरानीमा रात काटिरहेको सोही स्थानका तारा फागोले बताएका छन् ।
माओवादी शिविरका लडाकुहरूले ०६८ वैशाख ३० गते राति स्थानीयहरूसँग भएको विवादलाई लिएर ०६८ जेठ २ गते राति हतियारसहित गाउँमा प्रवेश गरी एक दर्जन सर्वसाधारणहरूलाई कुटपिट गरी घाइते बनाउनुका साथै ५ जना सर्वसाधारणहरूलाई अपहरणपश्चात शिविरमा लगेर जेठ ३ गते अपरान्ह रिहा गरेका थिए ।
घाइतेहरूको हाल धरानस्थित बिपी कोईराला स्वास्थ्य विज्ञान प्रतिष्ठान र दमकको दमक अस्पतालमा उपचार भईरहेको छ ।
घाइतेहरू जेठ ४ गते अपरान्ह इलाका प्रहरी कार्यालय दमकमा गई घाऊ जाँच गराउनुका साथै सरकारसमक्ष दोषीलाई कारबाहीको माग गरेका छन् । पीडित मध्येकै छवि लिम्वुले माओवादी लडाकुहरूले नेपाली जनताले तिरेका करबाट तलब खाई नेपाली जनतामाथि नै सांघातिक हमला गरी अन्याय गरेकोले यसको जिम्मेवारी सरकारले लिनु पर्ने बताएका छन् ।
घटनाका पीडितहरूसँग आज इन्सेक झापाका लक्ष्मी निरौला र अर्जुन बस्नेतले भेट गरी अनुगमन गरेका थिए ।

कुमार, इन्सेक