एउटा फोटोपीका लागि ३२ रुपैयाँ खर्च

लक्ष्मी उप्रेती

मेचीनगर २९ फाल्गनु । एउटा फोटोकपीको लागि तपाईहरु कति रुपैया तिर्नुहुन्छ ? २/३ वा ५ तर यस्तो ठाउँ पनि छ, जहाँ मानिसले एउटा फोटोकपी गर्नको लागि ३२ रुपैया खर्च गर्नुपर्छ । अचम्म लाग्छ होला कस्ता मानिस रहेछन्, अनि पनि यस्तो ठाउँमा मानिसहरु कसरी बाँचिरहेका छन् । 

अचम्म मान्नु पर्दैन यो कुनै विकट ठाउँमा भएको घटना भने पक्कै हैन । नेपालको पूर्वीद्वारा काँकडभिट्टाका मानिसहरुले भोग्दै आएको साझा समस्या हो । कुनै दिन काम विशेषले तपाईले पनि काँकडभिट्टा क्षेत्रमा कुनै फोटोकपी गर्नुपरेमा गोजीबाट २ रुपैया हैन ३२ रुपैया नै निकाल्नुपर्नेछ । 

नेपाल विद्युत प्राधिकरणको दैनिक १२ घण्टाको लोडसेडिङमा कारण एउटा फोटोकपी गर्नका लागि ३२ रुपैयाँको भाडा तिरेर सीमावर्ती भारतीयबजार धाउनुपर्छ । स्थानीयस्तरमा लोडसेडिङको विकल्पका रुपमा जेनेरेटर राखेर कुनै पनि फोटोकपी सञ्चालन हुन नसक्दा सेवाग्राहीले भारतीय बजार पानीट्याङ्की धाउनु परेको हो । 

‘काँकडभिट्टामा क्षेत्रमा आधा दर्जन फोटोकपी व्यावसायीहरु छन् तर लोडसेडिङ र न्यून भोलटेजका कारण उनीहरुका मेसिनहरु सञ्चालन हुन सकेका छैनन्, विद्युत आपूर्ति भएका बेला न्यून भोल्टेजका कारण मेसिन नै विग्रने डरले पनि व्यवसायीहरुले फोटोकपी मेसिन चलाउने गरेका छैनन्, त्यसैले पानीटयाङकी गयो फोटोकपी गरेर आयो,’ काँकडभिट्टा बसपार्क सामुन्ने फ्रेन्डसीप कम्युनिकेशन का प्रोपाइटर भगीरथ राई भन्छन् । 

काँकडभिट्टाबाट पानीटयाङ्की जान प्रतिव्यक्ति १० भारतीय रुपैयाँ तिर्नुपर्छ, गएर आउँदा ३२ रुपैयाँ रिक्साभाडा खर्च हुन्छ । त्यहाँ फोटोकपी गर्दा भारतीय व्यवसायीले प्रतिगोटा रु भारतीय २ रुपैयाँ तथा धेरै गर्दा प्रतिगोटा रु भारतीय १ रुपैया लिने गरेको सेवाग्राहीले बताउँछन् ।