धिमाल भए मिष्टर कोशी

उर्लाबारीका विकास धिमालले तेस्रो कोशी च्याम्पियन खुल्ला अञ्चलस्तरीय शारीरिक सुगठन प्रतियोगिताको उपाधी जितेका छन् ।

शनिबार धरानमा सम्पन्न प्रतियोगितामा २१ प्रतिष्पर्धीलाई पछि पार्दै उनले उपाधी हात पारेका हुन् । उपाधीसँगै उनले नगद २० हजार रुपैयाँसमेत प्राप्त गरे । उनी उर्लाबारीस्थित मेटालिक मल्टी जिममा आबद्ध छन् । प्रतियोगितामा उनी ६० केजी तौल समूहबाट सहभागी भएका थिए । प्रतियोगितामा ६५ केजी तौल समूहमा धरानको मेजेष्टी जिमका पूर्ण तामाङ दोस्रो भए । उनले नगद १० हजार रुपैयाँ प्राप्त गरे । यसैगरी बेलबारीको द डायमन्ड जिमका इन्द्र सापकोटाले तेस्रो स्थान हात पारेका थिए । नगद ६ हजार रुपैयाँ हात पारेका सापकोटा ६५ केजी ओभर तौल समूहबाट सहभागी भएका थिए ।

यस्तै, ५५ केजी तौल समूहबाट विराटनरका मोहन टी बाबु पासवानले सान्त्वना स्थान हात पारे । उनलाई आयोजकले नगद ४ हजार रुपैयाँ प्रदान गरेको थियो । प्रतियोगितामा धरानस्थित फिटनेस फ्याक्ट्री क्लबका ६० केजी तौल समूहबाट सुमन श्रेष्ठले बेष्ट पोजरको उपाधी हात पारेका थिए ।

सुनसरी क्षेत्र नम्बर १ का संविधानसभा सदस्य किरणकुमार राईको प्रमुख आतिथ्यमा भएको सो कार्यक्रममा मुख्य निर्णायक राजभगत प्रधानाङ्ग थिए । प्रतियोगितामा कैलाश कार्की र निमेश शाक्यले मार्सलको भूमिका निर्वाह गरेका थिए ।