माओवादीले ९० हजार मागेपछि गाउँबाट विस्थापित

अनैतिक यौन सम्बन्ध राखेको माओवादी आरोप-

खलङ्गा (बैतडी), १८ माघ-कोटिला गाविस-७ ऐरीगाउँ बस्ने बहादुर ऐरबाट स्थानीय माओवादी कार्यकर्ताले नब्बे हजार माग गरेपछि उनी गाउँबाट विस्थापित भएका छन्। स्थानीय घाणालेक बजारमा पसल थापी बसेका ऐरको पसलमा ९० हजार दिनुपर्छ भन्दै तालाबन्दी गरिएपछि उनी जिल्ला सदरमुकाम पुगेका हुन्।स्थानीय एक युवतीसित अनैतिक यौन सम्बन्ध राखी पेट बोकाएको हल्ला फैलिएपछि माओवादीका स्थानीय कार्यकर्ता ऐरको पसलमा पुगी रु ९० हजार मागेको स्थानीय एक ब्यापारीले बताए।

माओवादीका स्थानीय कार्यकर्ता जीतसिंह ऐर, अम्मर पार्की, धिरबहादुर ऐर, परे ऐर, प्रेमसिंह ऐर, उज्ज्ल साउद, उत्तर ऐर र गणेश ऐरीलगायतले आफूलाई अपहरणको शैलीमा भैंसीको गोठमा थुनेर कुटपिट गरेको बहादुरले बताएका छन्।

आफूलाई झुट्टा आरोप लगाएर पैसा असुल्न खोजेको र गाउँमा व्यवसाय गर्न असुरक्षा भएकाले गाउँ छाडी सदरमुकाम पुगेको उनको भनाइ छ। पसलको ताला खोलिदिन र सुरक्षाको माग गर्दै उनले जिल्ला प्रहरी कार्यालयमा निवेदन दिएका छन्।

बहादुर र ती युवतीबीच अवैध यौन सम्बन्ध रहन गई उनी गर्भवती भएपछि बहादुरबाट माओवादी कार्यकर्ताहरूले मिलापत्र गराइदिने भन्दै पैसा असुल्न खोजेको स्थानीय बासिन्दाले बताएका छन्।

गाउँमा युवतीसित आफ्नो सम्बन्ध रहेको स्वीकारेपछि ९० हजार रुपैयाँ उनका आफन्तलाई तिर्ने र युवतीसित बिहे गर्ने शर्त राखेका बहादुरलाई पैसा बुझाए पनि युवतीसित बिहे गर्न नमिल्ने भन्दै माओवादी कार्यकर्ताहरूले उनको पसलमा ताला लगाइदिएपछि उनी भागेर सदरमुकाम आएको उनका एक आफन्तले बताए।

ती युवती आफूसित नबस्ने भएपछि ९० हजार तिर्न नसक्ने बताउँदै बहादुर ऐरी भागेर जिल्ला सदरमुकाम आएको बताइएको छ। बहादुरले भन्छन् - 'नब्बे हजार उनका आफन्तलाई तिर्न तयार छु तर माओबादीहरूलाई होईन।' रासस