२५ वर्षीय युवकका ६ श्रीमती

पहिलो श्रीमतीलाई छोड्दा कारबाहीबाट बचाइएका एक २५ वर्षीय युवकले ललाइ-फकाई ६ वटा बिहे गरेका छन् । एउटी श्रीमतीलाई बिक्रीसमेत गरिसकेका उनी छैटौँ श्रीमती भित्र्याएपछि प्रहरीको फन्दामा परे ।

कञ्चनपुरको झलारी गाविस-२ सिमलफाँटाका २५ वषर्ीय प्रकाश नागरीले अनेक प्रलोभन देखाएर ६ वटा बिहे गरेका हुन् । ६ श्रीमतीमध्ये एउटीलाई बिक्री गरेको र एउटीलाई जात नमिलेको भन्दै छाडेको प्रहरीले जनाएको छ । चारवटी श्रीमती हाल उनीसँगै छन् । १५ दिनअघि मात्र उनले छैटाँै श्रीमतीका रूपमा १८ वषर्ीय युवतीलाई बिहे गरेका थिए । अहिले उनीसँग लक्ष्मी सुनार, कल्पना सुनार, बिर्मा भण्डारी र जानु दमाईं बस्दै आएका छन् । जेठी श्रीमती कल्पना वादीलाई जात नमिलेको भन्दै परिवारजनले ७ वर्षअगाडि नै छोड्न लगाएका थिए । चौथी श्रीमती पशुपति बोहरालाई बिक्री गरेको उनकै श्रीमतीहरूले बताएका छन् ।

प्रकाशले सात वर्षअघि कल्पनासँग बिहे गरेका थिए । तल्लो जातकी छोरी भन्दै उनका परिवारजनले कुटपिट गरेर कल्पनालाई छाड्न लगाएका हुन् । कल्पनाले कानुनको सहारा　पनि लिएकी थिइन् । तर, पैसाको बलमा मुद्दा प्रकाशले नै जितेका थिए भने कल्पनालाई छाडिएको थियो । विभिन्न सरकारी पदमा रहेका आफन्तजनले आफ्नो मान-सम्मान घट्ने जनाउँदै कल्पनालाई अलग गराएको उनले स्विकारे ।

सात वर्षअघि उनले लक्ष्मी सुनारसँग दोस्रो बिहे गरेका थिए । धार्मिक परम्पराअनुसार उनीहरूको बिहे भएको थियो । २४ वर्षीया लक्ष्मीबाट एक छोरी छन् । प्रकाशले छोरी जन्मिएपछि लक्ष्मीलाई पनि छाडे । '६ महिनाकी छोरी हुँदा छोड्यो,' लक्ष्मीले भनिन् । कञ्चनपुरमा बस्दै आएका प्रकाश ५ वर्षअघि काम गर्न दार्चुला गएका थिए । उनले दार्चुलाबाट तेस्रो बिहे गरेर ल्याए । कल्पना सुनारसँग बिहे गरेर कञ्चनपुर आए । २३ वर्षीय कल्पनासँग बिहे गर्दा लक्ष्मीले प्रहरीमा उजुरी पनि गरेकी थिइन् । झलारी इलाका प्रहरी कार्यालयमा उजुरी गरे पनि उनलाई त्यत्तिकै छाडियो । 'उनको परिवारको दबाबमा कुरा मिलाइयो,' लक्ष्मीले रुँदै भनिन्, 'दुःख दिने छैन, पालेर राख्नेछु भनेर प्रहरी कार्यालयमै कागज बनायो । मैले पनि ठीकै छ भनेर मानेँ ।'

त्यसपछि पनि उनीहरूबीच कुराकानी मिलेन । एक छोरीसहित लक्ष्मी माइतीमै बस्दै आएकी थिइन् भने कल्पना घरमा । कल्पनाका दुई छोरा छन् । सिमलफाँटामा बस्दै आएका प्रकाश दुई वर्षअघि कामका लागि भारतको धार्चुला गए । त्यही वेला उनले दार्चुलामै अर्को बिहे गरे । एक वर्षअघि बिर्मा भण्डारी र पशुपति बोहरालाई बिहे गरेका हुन् । 'म आर्मी हुँ भन्दै फकायो,' २५ वर्षीया बिर्माले भनिन् । सैनिक हुँ भनेर ठगेका उनले आप\mनोबारेमा पनि धेरै बताएनन् । 'कुँवरको छोरा हुँ, बिहे गरेको छैन, बिहे गरौँ भनेर ल्यायो,' बिर्माले भनिन् ।

बिर्माका श्रीमान् मानसिंह भण्डारी मलेसियामा वैदेशिक रोजगारीमा थिए । उनका तीन छोरी पनि छन् । तीन छोरी हुँदाहुँदै पनि चौथो बिहे बिर्मासँग गरे । मलेसियाबाट मानसिंहले पठाएको पैसा बोकेर धार्चुलाबाट बिर्मालाई मात्रै भगाएनन् अर्की पशुपति बोहरालाई पनि ल्याए ।

२० वर्षीय पशुपतिका श्रीमान् पनि मेलसियामै थिए । उनले उता अर्को बिहे गरेका कारण पशुपति पनि प्रकाशसँग बिहे गरेर आएको उनले बताए । बिर्मा र पशुपतिलाई सँगै कञ्चनपुर ल्याएका उनले पशुपतिलाई भने केही दिन मात्रै घरमा राखे । 'घुम्न जान्छाँै भनेर दुवैजना घरबाट निस्केका हुन् । पशुपतिलाई कहाँ हाल्यो थाहा छैन,' बिर्माले भनिन् । पशुपतिलाई १८ हजारमा अर्कैलाई बेचेको लक्ष्मीले बताइन् । 'उताबाट बिहे गरेर ल्यायो, यहाँ अर्कैसँग बेचिदियो,' उनले भनिन् । बिर्मातर्फ एक छोरी छिन् ।

त्यति हुदा पनि कसैले उजुरी गरेका थिएनन् । दोस्रो श्रीमती लक्ष्मी माइतमै बस्दै आएकी थिइन् भने तेस्रो कल्पना र चौथो बिर्मा घरमा बस्दै आएका थिए । पाँचौँ श्रीमती पशुपतिलाई भने उनले बिक्री गरेको लक्ष्मी, कल्पना र बिर्माको भनाइ छ ।　 महेन्द्रनगर बजारमा सिलाइको काम गर्दै आएका उनले यही माघ २ गते फेरि १८ वर्षीया जानुसँग बिहे गरेका छन् । 'बजारमै कोठा लिएर राखेको रहेछ,' बिर्माले भनिन्, 'भेट्न आउँदा पो थाहा पाए ।'

आइतबार लक्ष्मी, कल्पना र बिर्माले महिलाको अधिकारबारे काम गरिरहेको महिला तथा वृद्धा सेवा केन्द्रमा सहयोगका लागि निवेदन दिएका छन् । तीनजनाले सहयोग माग्दै केन्द्रमा आएपछि कानुनी कारबाहीका लागि पहल गरेको केन्द्र अध्यक्ष शारदा चन्दले बताइन् । प्रकाश र जानुलाई प्रहरीले नियन्त्रणमा लिएको छ भने लक्ष्मी, कल्पना र बिर्मा महिला सेवा केन्द्रमै छन् ।

कानुनअनुसार प्रकाशलाई कारबाही र उनीहरूलाई न्याय दिलाउन पहल गर्ने चन्दले बताइन् । प्रहरीले पनि प्रकाशलाई कानुनअनुसार कारबाही गरिने जनाएको छ । 'अहिले नियन्त्रणमा लिएका छौँ, अनुसन्धानपछि कस्तो कारबाही गर्ने भन्ने थाहा हुन्छ ।' महेन्द्रनगर वडा प्रहरी कार्यालयका प्रहरी निरीक्षक चक्रराज जोशीले भने । बहुविवाह तथा बेचबिखनमा मुद्दा चलाउन सकिने प्रहरीले जनाएको छ । @ Nayapatrika