सशस्त्र प्रहरीले जिल्लाका विभिन्न स्थानमा चेकजाँचको नाममा अवैध रकम असुली गर्ने गरेको छ । राजस्व छलेर सामान ल्याउने तथा अवैध वस्तु तस्करी गर्नेलाई पक्राउ गर्नुको साट्टो उल्टै रकम असुल्ने गरिएको हो ।
सरकारले राजस्व चुहावट नियन्त्रणका लागि भन्सारलगायत स्थानमा चेकजाँचको अधिकार सशस्त्र प्रहरीलाई दिएको छ । वीरगन्ज क्षेत्रबाट राजधानीलगायत देशका विभिन्न स्थानमा जाने थुप्रै भारतीय सामान राजस्व नतिरी भित्रिएका हुन्छन् । त्यस्ता सामान बरामद गर्नुको साटो सशस्त्र प्रहरीले रकम लिएर छाडिदिने गरेका छन् ।
विशेषगरी भारतबाट अवैध रूपले नेपाल भित्रिने कपडा, रासायनिक मल, जिरा, केराउ-गेडागुडीजस्ता वस्तुहरू लोड गरी देशका विभिन्न भागमा ढुवानी गर्नेक्रममा सशस्त्र प्रहरीले व्यस्त सडकमै रोकी रकम लिएको पाइन्छ । त्यसो त नेपालभित्रै अवैध रूपले ओसारपसार हुने जडिबुटी, उत्तिस, खयर तथा गाईगोरुको कारोबार गर्नेसँग समेत सशस्त्रले रकम लिने गरेको एक कारोबारीले बताए ।
यस्ता सामानका कारोबारीसँग आफूहरूले पनि रकम लिन पाउनुपर्ने भन्दै स्थानीय युवाहरूले आधा दर्जनजति गाडीमा तोडफोड गरिदिएको समेत ती कारोबारीको भनाइ छ ।
उनले भने, 'केटाहरूले सशस्त्र प्रहरीलाई मात्र दिने, हामीलाई नदिने भन्दै व्यवसायी आक्रमण गर्छन् ।'
कारबाहीको जिम्मेवारी पाएकाले नै अवैध रकम असुली गर्न थालेपछि चोरीनिकासी नियन्त्रण हुन नसकेको राजस्व अनुसन्धानकै एक अधिकृत बताउँछन् । विगत ६ महिनायता खासै सामानहरू पक्राउ गरेर कारबाहीका लागि नबुझाइएको ती अधिकृतले जानकारी दिए ।प्रहरी सहायक निरीक्षकको कमान्डमा जिल्लामा मात्रै आधा दर्जन स्थानमा सशस्त्र प्रहरीले चेकजाँचका लागि टोली खटाउने गरेको छ । मध्य-क्षेत्रीय सशस्त्र प्रहरी बल रुद्रवाहिनी पथलैयाका सशस्त्र प्रहरी वरिष्ठ उपरीक्षक दिवाकर केसीले चेकजाँच गर्ने स्थानमा भएका अनियमितताबारे सोध-खोज गरिने बताए । उनले भने, 'यदि कसैले गल्ती गरेको भेटिए कारबाही हुनेछ ।' @ Nayapatrika
पत्रिकामा फोटो नाछापुन्जेल कारवाई नगर्ने प्रचलन नेपालमा जमिसक्यो के गर्ने र
ReplyDelete