ठमेल वाइफाई क्षेत्र बन्दै

 पर्यटकीय दृष्टिकोणले महत्त्वपूर्ण क्षेत्र ठमेललाई वाइफाई सुविधासम्पन्न क्षेत्र बनाइने भएको छ । ठमेल पर्यटन विकास परिषद् र मर्कण्टाइल कम्युनिकेशन प्रालिको संयुक्त पहलमा ठमेललाई वाइफाई क्षेत्र बनाउन लागिएको हो । यो सेवा सञ्चालनका लागि मर्कण्टाइलले करीब रू. ४ करोड लगानी गर्ने भएको छ ।

सेवा सञ्चालनका लागि ठमेलमा रहेका होटल, रेष्टुराँ तथा डिपार्टमेण्टल स्टोरका सञ्चालकहरूसँग छलफलसमेत भइसकेको ठमेल पर्यटन विकास परिषद्का अध्यक्ष तेजेन्द्रनाथ श्रेष्ठले बताए । उनका अनुसार यो सेवा सञ्चालनका लागि सबै पक्ष सकारात्मक देखिएका छन् । आगामी एक हप्ताभित्र ठमेलमा वाइफाई सुविधा शुरू गरिने पनि उनले जानकारी दिए । यो सुविधा शुरू भएपछि ठमेलभित्र जुनसुकै स्थानमा पनि वाइफाईको सुविधा उपलब्ध हुनेछ ।

अहिले ठमेलका केही होटल तथा रेष्टुराँमा निःशुल्क वाइफाईको सुविधा भए पनि गुणस्तरीय नभएका कारण नयाँ वाइफाई सुविधा उपलब्ध गराउन लागिएको श्रेष्ठले जानकारी दिए । तर, आफूले शुरू गर्न लागेको सेवा भने सशुल्क हुने श्रेष्ठले बताए । २४ सै घण्टा उपलब्ध गराइने सो सेवाका लागि अहिले पावर ब्याकअपको तयारी भइरहेको बताइएको छ । गत बिहीवार त्यसबारे छलफल गर्न ठमेलस्थित मस्याङ्दी होटलमा बैठक बसेको थियो ।

लगानीकर्ता कम्पनी मर्कण्टाइल कम्युनिकेशनका कार्यकारी निर्देशक प्रचण्डमान शाक्यले सेवा सञ्चालन गुणस्तरीय हुने बताए । उनका अनुसार सेवा सञ्चालनपछि आन्तरिक तथा बा⋲य पर्यटक आर्कषण गर्न सहज हुनेछ ।

सम्पूर्ण ठमेललाई वाइफाई क्षेत्र बनाउन भने ६ महीनादेखि १ वर्ष लाग्नेछ । शुरूमा ठमेलका मुख्य स्थानमा सुविधा सञ्चालन गरिने र बाँकी भागमा माग र आवश्यकताका आधारमा सुविधा उपलब्ध गराइनेछ । यस्तै वाइफाई सुविधा प्रयोग गर्नका लागि वाइफाई कार्डको व्यवस्थासमेत गरिने श्रेष्ठले बताए । अहिले कस्तो र कति मूल्यबराबरको कार्ड बनाउने भन्नेबारेमा छलफल भइरहेको बुझिएको छ । श्रेष्ठका अनुसार कार्ड एक घण्टा, एक दिन, एक महीना कति आवश्यक पर्ने हो, सोहीअनुसार बनाइनेछ । अहिले कार्ड प्रतिघण्टा ७५ देखि १ सय रुपैयाँसम्मको बनाउनेबारेमा छलफल भइरहेको छ । वाइफाई सुविधा सञ्चालनपछि ठमेल क्षेत्रको विशिष्ट पहिचान हुनुका साथै यसको विकासमा समेत सहयोग पुग्ने श्रेष्ठको विश्वास छ । कार्ड विक्रीबाट उठेको रकमको ५० प्रतिशत मर्कण्टाइलले, २० प्रतिशत परिषद् र ३० प्रतिशत रकम विक्री गर्नेले पाउने पनि उनले बताए । 'यसबाट सेवाग्राहीले एकातिर गुणस्तरीय सुविधा पाउने छन् भने अर्कोतिर आम्दानी पनि राम्रो हुनेछ' श्रेष्ठले भने ।

ठमेल पर्यटन विकास परिषद्का अनुसार ठमेलमा अहिले २ सय होटल, १ सय ५० भन्दा बढी रेष्टुराँ र २ हजार ६ सयओटा विभिन्न पसल छन् । ती होटल, रेष्टुराँ र पसलमा गरी इण्टरनेटका ग्राहक हजारौंको सङ्ख्यामा छन् । ठमेल क्षेत्रभित्रको करीब ५ किलोमिटर बाटो र साना गल्लीहरूमा समेत वाइफाईको सुविधा उपलब्ध गराइने परिषद्को भनाइ छ । सो क्षेत्र अत्यधिक पर्यटक आउने क्षेत्र भएकाले पनि इण्टरनेट ग्राहक सङ्ख्या अधिक भएको हो । देशमा आउने कुल पर्यटकमध्ये ८० प्रतिशतभन्दा बढी पर्यटक एकपटक ठमेल पुग्ने तथ्याङ्क छ ।

त्यस्तै, ठमेलका प्रमुख चोकहरूमा राति उज्यालोका लागि १ सयओटा सीएफएल जडान गर्ने कार्य पनि भइरहेको छ । सो कार्यअन्तर्गत अहिले १० ओटा सीएफएल जडान गर्ने कार्य पूरा भइसकेको छ । बाँकी ९० ओटा सीएफएल जडानका लागि आर्थिक सहयोग जुटाउने कार्य भइरहेको छ । साधारणतया एउटा सीएफएल जडानका लागि करीब ३ सय रुपैयाँ खर्च हुन्छ । सीएफएल १० वाटको हुनेछ । ठमेलमा अन्य स्थानमा भन्दा रातको समयमा समेत चहलपहल हुने भएकाले सीएफएल जडान गर्ने तयारीमा परिषद् जुटेको हो । यसअघि उज्यालोका लागि सोलारको व्यवस्था गर्ने योजना भए पनि धेरै खर्च हुने देखिएकाले उक्त योजना स्थगित गरिएको थियो ।