पशुपतिनगरमा पर्यटन सूचना केन्द्र

इलाम, माघ १७ - 

वाषिर्क ढेड लाखभन्दा बढी भारतीय पर्यटक आउने सीमावर्ती पशुपतिनगरमा सूचना केन्द्र नहुँदा समस्या भएपछि स्थानीय बासिन्दाहरू केन्द्रको स्थापनाका लागि अघि सरेका छन् । यति धरै पर्यटक आउने स्थानमा व्यस्थित सूचना केन्द्र स्थापना गरी उनीहरूलाई अन्य क्षेत्रको भम्रण गराउने योजना छ ।

केन्द्रमा विभिन्न फोटो, ब्रोसर, टेलिभिजनलगायत माध्यमबाट पर्यटकीय क्षेत्रका जानकारी गराइने पशुपतिनगर पर्यटन विकास समितिका सचिव कमल गदालले बताए । दुई दिनभित्र ठाउँ सम्याएर काम थालिने उनले जानकारी दिए । नेपालीभन्दा यहाँ भारतीय पर्यटक धेरै आउने गरेकाले सूचना केन्द्रको आवश्यकता भएको हो । 

यहाँ गत वर्ष मात्र १ लाख ७३ हजार भारतीय पर्यटक आएका थिए । जव कि यो वर्ष दार्जिलिङ घुम्न जाने नेपाली पर्यटक १ लाख २७ हजार मात्र भएको इलाका प्रहरी कार्यालय पशुपतिनगरले जनाएको छ । 

फाटकस्थित दसगजा नजिक क्षेत्रमा बन्ने दुई तले पक्की भवनका लागि जग्गा खाली गर्ने काम भइरहेको गदालले बताए । 'सूचना केन्द्र निर्माणपछि यो क्षेत्रका पर्यटनसँगै जिल्लाको सिङ्गो पर्यटन विकासलाई सघाउनेछ,' उनले भने, 'स्थानीय प्रयासमा सूचना केन्द्र बनाउन लागेकाले सम्बन्धित सरोकारवालाहरूबाट सहयोगको अपेक्षा गरेका छौं ।' त्यही स्थानमा मैत्री पार्कसमेत बन्नेछ ।

सीमावर्ती यो क्षेत्रमा पर्यटन केन्द्र नहुँदा दिनहुँ आउने बंगाली पर्यटकले पर्यटनसम्बन्धी आवश्यक सूचना पाउन सकेका छैनन् । यो क्षेत्रमा अध्यागमन केन्द्र नुहँदा पनि तेस्रो मुलुकका पर्यटक नेपाल पस्न सकेका छैनन् । 'सरकारले अध्यागमन केन्द्र निर्माणका लागि पहल गरे दार्जिलिङ आउने धेरै पर्यटक इलाम आउन सक्ने थिए,' उनले भने । विद्युतीय सामाग्री, कपडाजस्ता सामग्री खरिदका लागि प्रख्यात यो बजार पछिल्लो समयमा सुनसान बन्दै गएपछि स्थानीयले यहाँको पर्यटन विकासमा चासो देखाएका हुन् । 

पशुपतिनगरलाई पुरानै स्थितिमा लैजान पर्यटन एकमात्र माध्यम भएको स्थानीय मिलन क्षेत्री बताउँछन् । 'दार्जिलिङ आएका पर्यटकहरू नेपाली बजार हेर्न भन्दै केही क्षणका लागि मात्र नेपाल आउँछन्,' उनले भने, 'यहाँ पनि पूर्वाधार विकास गरेर पर्यटकीय गन्तव्य नै बनाउनुपर्छ ।'