जिएसएम मोबाइलमा पहिलो हुने प्रतिस्पर्धा

काठमाडौ, माघ १७ - दूरसञ्चार क्षेत्रमा सबैभन्दा बढी उपभोक्ता रहेको जिएसएम मोबाइलमा पहिलो नेपाल टेलिकमलाई निजी क्षेत्रका कम्पनीले उछिन्ने चुनौती बढिरहेको बेला उसले १५ लाख सिमकार्ड वितरण गर्ने तयारी गरेको छ ।

टेलिकम सञ्चालक समितिका सदस्य टंक श्रेष्ठका अनुसार कम्पनीले जिएसएम पि्रपेड मोबाइलको बजार विस्तारका लागि आक्रामक रूपले उत्रने योजना बनाएको छ । 'एक महिनामा १५ लाख जिएसएम सिमकार्ड वितरण सुरु गर्ने योजना बनाएका छौं,' उनले भने, 'यो आउने महिनाबाट सुरु गर्छौ ।' यस्तै सरकारी स्वामित्वको टेलिकमले यस वर्षभित्र कम्तीमा १८ लाख जिएसएम मोबाइल उपभोक्ता थप्ने योजनासमेत बनाएको छ ।

एक वर्षयता टेलिकम र एनसेलका जिएसएम उपभोक्ताको संख्या अन्तर अत्यन्त न्यून भए पनि पहिलो रहिरहन कम्पनीले यस्तो योजना ल्याएको हो । टेलिकमले अहिले उपभोक्ताले चाहेको बेला जिएसएम मोबाइल सिम वितरण गर्न सकेको छैन । नियामक निकायका एक अधिकारीले टेलिकम र एनसेलको वृद्धिदर यसै अनुपातमा भए केही महिनामै जिएसएम मोबाइलको क्षेत्रमा टेलिकमपछि पर्ने सम्भावना बढेको बताए ।

श्रेष्ठका अनुसार कम्पनीको जिएसएम पि्रपेड सिमको माग अहिले पनि उच्च छ । कम्पनीले थप ५० लाख क्षमताको जिएसएम र सिडिएमए मोबाइलको पूर्वाधार बनाउने टेन्डर आह्वान गर्न लागेको र काम अन्तिम चरणमा पुगेको बताए ।

प्राधिकरणको तथ्यांकअनुसार गत मंसिरका तुलनामा मंसिरमा टेलिकमका जिएसएम उपभोक्ता ७ लाख ६० हजार थपिएका छन् । एनसेलले भने १८ लाख ८० हजार उपभोक्ता थपेको छ । यस अवधिमा यी दुई कम्पनीबीच भएको उपभोक्ता बढाउने प्रतिस्पर्धाले सेवाको शुल्कमा समेत उल्लेख्य गिरावट आएको छ ।

तथ्यांकअनुसार यस मंसिरसम्म टेलिकमको जिएसएम उपभोक्ता एनसेलको भन्दा १ लाख ६० हजार कम छन् । तर गत मंसिरमा टेलिकमको जिएसएम उपभोक्ता एनसेलको भन्दा १२ लाख ८० हजार बढी थिए । गत मंसिरमा टेलिकमका उपभोक्ता ३४ लाख ८० हजार थिए भने एनसेलका २२ लाख थिए । एक वर्षमा टेलिकमका ४२ लाख ४० हजार पुगेका छन् भने एनसेलका ४० लाख ८० हजार छन् ।

प्राधिकरणका ती अधिकारी जिएसएम मोबाइलको क्षेत्रमा पहिलो स्थानमा रहेको एनसेलको आक्रामक योजना र पहिलो स्थानमा रहिरहने टेलिकमको चाहनाले प्रतिस्पर्धा अझै बढ्ने बताउछन् । यस्तो प्रतिस्पर्धाबाट उपभोक्ताले सिद्धान्ततः गुणस्तरीय र कम शुल्कमा सेवा पाउँछन् । हाल दूरसञ्चार क्षेत्रमा सबैभन्दा बढी उपभोक्ता जिएसएम मोबाइलका छन् । मंसिर महिनासम्म दूरसञ्चार उपभोक्ताको संख्या १ करोड ६ लाख पुगेको छ । त्यसको ७८ दशमलव २५ प्रतिशत उपभोक्ता जिएसएम मोबाइलका छन् ।

एनसेलले ग्रामीण क्षेत्रमासमेत गुणस्तरीय सेवा दिने योजनाका साथ पूर्वाधार विकासमा लागेको जनाएको छ । कम्पनीकी कर्पोरेट कम्प्युनिकेसन म्यानेजर सञ्जु कोइरालले एनसेल नेटवर्कको गुणस्तर सुधार र सेवा विस्तारमा लागेको बताइन् । एनसेलले पूर्वाधार विस्तारका लागि यस वर्ष १० करोड अमेरिकी डलर खर्च गर्ने घोषणा यसअघि नै गरिसकेको छ ।

नियामक निकायका अधिकारीहरू भने दुवै कम्पनी ग्राहक संख्या थप्ने होडबाजीमा लागेका बेला सेवाको गुणस्तरमा भने कम ध्यान पुगिरहेको बताउँछन् । ग्राहकको दबाब निरन्तर भएमा यसमा पनि सुधार हुने आशा उनीहरूको छ । 'धेरै बाढेपछि गुणस्तर सुधार भएन भने ग्राहक टिकाइराख्न अब सजिलो छैन,' उनले भने । @ eKantipur