अन्तराष्ट्रिय लेबर मञ्च (क्रान्तिकारी) श्रमिकको पक्षमा उत्रीने

दिनेश कार्की/ मेचीनगर अनलाईन 

 बैदेशिक रोजगारीमा गएका प्रगतिशिल युवाहरु संगठीत हुन थालेका छन् । रोजगारीको खोजीमा विभिन्न मुलुक गरेर २० लाख भन्दा बढी नेपालीहरु विदेशमा श्रम सम्झौता अनुसारको काम, तलब नपाउने श्रमिकहरुलाई सहयोग गर्ने उद्देश्यले संगठीत हुन थालेका हुन् । साउदी अरब, कतार, मलेसिया, दुबई, लिबिया, बहराईन, कुवेत, इज्रायल, ओमान लगायतका देशहरुमा कार्यरत श्रमिकहरुको अगुवाईमा अन्तराष्ट्रिय लेबर मञ्च (क्रान्तिकारी) गठन गर्न लागिएको मलेसियामा कार्यरत प्रगतिशिल मञ्च मलेसियाका सुमन सिंह पौडेलले मेचीनगर अनलाईनलाई बताए । “जताततै श्रमिकहरु दिनहुँ लुटिरहेका छन्, उनीहरुलाई न्याय दिने निकाय सबै बिकेका छन् यस्तो अवस्थामा हामीलाई न्याय कसले दिने ?” पौडेलले भने “त्यसैले हामीले अन्तराष्ट्रिय स्तरबाटै हामी संगठीत हुँदैछौं ।” 

“हामीले सबै देशबाट हाम्रा प्रतिनिधिहरु नेपाल पठाई सकेका छौं" अन्तराष्ट्रिय लेवर मञ्च(क्रान्तिकरी) साउदी अरबका संयोजक दील सुब्बाले भने “हाम्रो कार्यक्रमको खाका नेपालबाट हाम्रा साथीहरुले तयार गरी रहनु भएको छ । यहिँ फागुन पहिलो साताबाट हाम्रा कार्यक्रमहरु सार्वजनिक गर्ने छौं ।”  त्यस्तै मञ्चकै दुबई संयोजक उत्तम अधिकारीका अनुसार नेपालमा कार्यलय राखी बैदेशिक रोजगारीको नाममा हुने ठगी, लुटलाई नियन्त्रण गर्दै प्रवासमा श्रमिकहरुमाथि आईपर्ने सबै खाले शोषणको निर्मुल पार्न तर्फ केन्द्रीत हुने छ । सरकार तथा राजनीतिक दलहरु सधैभरी सत्ता केन्द्रीत हुने हुदा मुलुककै अर्थतन्त्र धानिरहेका श्रमिकहरुमाथि अन्याय भईरहेको छ भन्ने उनीहरुको आरोप छ । बैदेशिक रोजगारीलाई ब्यवस्थित र पारदर्शी बनाउँदै प्रवासमा रहेका श्रमिकहरुलाई संगठीत गराई सबैखाले शोषणको अन्त्य गर्न  चाडै सशक्त भूमिका खेल्ने बहराईनका संयोजक देवीलाल डुम्रेले जनाए । 

“भाषा, कानूनी प्रावधान, कम्पनीको नीति नियम जस्ता कुराहरुको अभावले गर्दा नेपाली श्रमिकहरु दिनदिनै मृत्युको शिकार भईरहेका छन् । झन् महिलामा श्रमिकहरुमाथि हुने शोषणले चरम सीमा नाघिसकेको छ ” मञ्चका कतार संयोजक शुसील खड्काले भने “अब त्यस्ता ठगहरुका दिन गए ।”