विश्व किर्तिमानकोलागी झलकको उल्टो गाडि यात्रा सुरु

काठमाडौ, २१ असार । गिनिजबुक अफ बल्र्ड रेकर्डमा नाम लेखाउने उद्देश्य सहित झलकबहादुर थापाले काठमाडौदेखि दोलखासम्मको उल्टो सवारी यात्रा सुरु गरेका छन् ।

आज विहान राजधानीको दशरथ रंगशालामा आयोजित विशेष कार्यक्रमबाट उनले आफ्नो किर्तिमानी यात्रा सुरु गरेका हुन । उनलाई राप्रपा नेपालका अध्यक्ष कमल थापाले टोयोटा ल्याण्ड क्रुजर गाडिको चावी हस्तान्तरण गरेर यात्राको सुरुवात गरेका हुन ।
मुनाफ नामक संस्थाको आयोजनामा भएको सो उल्टो सवारी यात्रा दोलखासम्म सफलतापूर्वक पुगे त्यसले विश्व किर्तिमान कायम गर्ने र यसको सम्पूर्ण प्रक्रिया पुरा गरेको आयोजक संस्थाका अध्यक्ष प्रेमध्वजले जानकारी दिए ।
साहसीक उल्टो सवारी यात्री झलकलाई चावी हस्तान्तरण गर्दै राप्रपा नेपालका अध्यक्ष कमल थापाले यस्तो साहसीक यात्रालाई सबैले सम्मान र सहयोग गर्नु पर्ने धारणा राखे । उनले नेपाल र नेपालीको नाम विश्वमै उचो राख्ने यस्तो यात्रालाई सफल बनाउन सरकार, नेपाली नागरिक सबैले सक्दो सहयोग गर्नु पर्ने बताए । उनले एउटा नेपालीले साहसिक यात्रा गरेर गिनिजबुकमा नेपालको नाम अंकित गराउनु सबैकोलागी गौरबको विषय भएको बताए ।
सोही कार्यक्रममा रिपोर्टर्स क्लब नेपालका अध्यक्ष ऋषि धमलाले राज्यले सहयोग गर्नु पर्नेमा आफै र समाजले मात्रै सहयोग गरेर एक नेपालीले विश्व किर्तिमानकोलागी सहसिक यात्रा गर्नु राज्यकोलागी गंभिर चुनौति भएको भन्दै राज्यले किर्तिमान यात्रालाई बेवास्ता गर्नु लाजमर्दो अवस्था भएको आरोप लगाए । उनले नेपाली पत्रकारीता राजनीतिक विषयबस्तुमा मात्रै अल्झिदा अन्य क्षेत्रले प्रोत्साहन पाउन नसकेको दावी गर्दै पत्रकारिताले यस्ता किर्तिमानलाई प्रोत्साहन गर्नु पर्ने बताए ।
उनले हिजो रिपोर्टर्स क्लबमा पत्रकार सम्मेलन गर्दा खगेन्द्र थापामगरलाई मिडीयाले प्रारम्भमा बेवस्ता गरेको स्मरण गर्दै अब यस्तो प्रथालाई मिडियाले पन्छाउनु पर्ने सुझाव दिए ।
किर्तिमान यात्रालाई सुभकामना दिन आयोजित कार्यक्रममा क्षेत्री समाज महासंघका अध्यक्ष भुपति खडका, मधुकर थापा, क्षेत्री समाजका महासचिव रामकुमार क्षेत्रीलगायतकाले सफलताको सुभकामना दिएको थिए । अहिले यात्रा जारी रहेको छ । उनको सहयोगकोलागी आयोजक , सुभचिन्तक र पत्रकारहरु पनि साथ साथै रहेका छन् ।