माओवादी नेताको 'क्यारिकेचर’ गर्दै चार बैंकरबाट ठगी

चार बैंकबाट ३१ लाख ठग्ने ईश्वरीप्रसाद पोखरेल पूर्व भारतीय गोर्खा सैनिक थिए

फोनमा माओवादी नेताको आवाज नक्कल गरेको भरमा पैसा सापटीको रूपमा लिन्थे

माओवादी नेताहरूको नाममा नक्कली नागरिकता समेत बनाएनन्, बैंक खातासमेत खोले

'मैले धनीलाई मात्र ठगेको हुँ, गरिबलाई ठगेको छैन,’ प्रहरीले समातेपछि पोखरेलले भने

आफूलाई माओवादी केन्द्रीय नेताका रूपमा प्रस्तुत गरेर बैंकका प्रमुखलाई लाखौँ ठगी गर्ने एक युवक पक्राउ परेका छन् । उनले माओवादी नेताहरू नेत्रविक्रम चन्द विप्लव, जनार्दन शर्मा, हिमाल शर्मालगायत नेताको नाममा चारवटा बैंकका सिइओलाई ठग्न भ्याएका थिए ।

हालसम्म चार बैंकबाट ३१ लाख ठगिसकेका ईश्वरीप्रसाद पोखरेललाई प्रहरीले मंगलबार काठमाडौंमा पक्राउ गरेको हो । उनले समस्या परेको भन्दै केही समयका लागि भनेर बैंकका प्रमुखसँग मोटो रकम सापट माग्ने र पछि मोबाइल बन्द गरेर बेपत्ता हुने गरेका थिए ।

पोखरेलले किस्ट बैंकका प्रमुख कार्यकारी अधिकृत कमल ज्ञवालीसित १२ लाख, एनएमबी बैंकबाट नौ लाख ५० हजार, मध्यपश्चिम ग्रामीण विकास बैंकबाट पाँच लाख र कणर्ाली विकास बैंकबाट चार लाख ५० हजार गरी ३१ ल्ााख रुपैयाँ ठगी गरेको प्रहरीले जनाएको छ ।

महानगरीय प्रहरी आयुक्तको कार्यालयका प्रवक्ता एसएसपी माधव नेपालका अनुसार एक-दुई चोटी सापट लिएको पैसा भनेकै मितिमा तिरेर विश्वासमा लिएपछि उनले ठूलो रकम लिएर फरार हुने गरेका थिए । पोखरेलले पहिलोपटक आफू माओवादी नेता नेत्रविक्रम चन्द विप्लव भएको र पालुङटार बैठकमा रहेको भन्दै किस्ट बैंकका सिइओ ज्ञवालीसँग चार लाख रुपैयाँ सापट मागेका थिए । माओवादीका केन्द्रीय नेताले समस्या परेको बताएपछि ज्ञवालीले पैसा दिए । समयमै सो रकम पोखरेलले फिर्ता पनि गरे । पछि फेरि समस्या परेको बताउँदै आठ लाख रुपैयाँ मागे । त्यो पनि समयमै पैसा फिर्ता गरे । तेस्रोपटक ज्ञवालीले दिएको १२ लाख रुपैयाँ भने उठ्न सकेन ।

बैंक अफ काठमाडौंमा पोखरेलले नेता विप्लवको नाममा खोलेको खातामा ज्ञवालीले सो रकम पठाएका थिए । पछि विप्लवसँग भेट्दा सिइओ ज्ञवालीले पैसाको कुरा निकालेपछि वास्तविकता बाहिर आएको हो । 'नेता विप्लवले बैंक अफ काठमाडौंमा आफ्नो खाता नरहेको र पैसा पनि नलिएको बताएपछि मैलै आफू ठगिएको थाहा पाएँ,' ज्ञवालीले नयाँ पत्रिकासँग भने ।

माओवादी नेता विप्लवले आफ्नो नाममा ठगी गरेकोबारे तीनवटा उजुरी आएको बताएका छन् । 'यस विषयमा किस्ट बैंकसँग पनि मेरो छलफल भएको थियो,' उनले भने, 'यो अपराध मात्र होइन हाम्रोविरुद्ध षड्यन्त्र पनि हो ।'

कणर्ाली विकास बैंक र मध्यमाञ्चल ग्रामीण विकास बैंकका सिइओलाई पनि उनले सोही तरिका अपनाएर ठगी गरेका थिए । अभियुक्त पोखरेलले माओवादी नेताहरूको नाममा नक्कली नागरिकतासमेत बनाई त्यसकै आधारमा बैंकमा खाता खोलेको र खातामा पैसा माग्ने गरेको प्रहरीले बताएको छ ।

पक्राउ परेका पोखरेलले माओवादीसँग प्रतिशोध लिनका लागि त्यसरी ठगेको बताएका छन् । 'मैले धनीलाई मात्र ठगेको हुँ, गरिबलाई ठगेको छैन,' उनले मंगलबार महानगरीय प्रहरी आयुक्त कार्यालयमा आयोजित पत्रकार सम्मेलनमा सञ्चारकर्मीसँग भने ।

पोखरेल पूर्व भारतीय सैनिक रहेको खुलेको छ । उनले आफूलाई ०५९ मा प्युठानमा माओवादीले अपहरण गरेको दाबी गरेका छन् । 'प्युठानको तोवाङबाट मलाई माओवादीले अपहरण गरेर ६ महिनासम्म तालिम दिन लगाए र मेरो जागिर पनि गयो । त्यसैको रिसिबीले म ठगी धन्दामा लागेको हुँ,' उनले भने । त्यतिखेर सो क्षेत्रका सैन्य कमान्डर रहेका माओवादी सभासद् दीपक केसीले अपहरण गरेर तालिम दिन लगाएको उनको भनाइ छ ।

सभासद् केसीले भने सो व्यक्तिलाई आफूले चिनेको तर अपहरण नगरेको बताएका छन् । 'माओवादीमा लाग्छु भनेर ऊ एकचोटि आएको थियो,' केसी भन्छन्, 'मैले पार्टीमा सम्पर्क पनि गराइदिएको हुँ । पछि पार्टीमै बदमासी गरेपछि उसलाई कारबाही गरिएको हो ।'

माओवादी छाडेपछि पोखरेल भारत र्फकेका थिए । उनले सेनाको जागिर गएकाले दिल्लीमा कपडापसलमा काम गरेको बताए । कपडापसलबाट आठ लाख ५० हजार भारु चोरी गरेर ०६५ मा उनी नेपाल फर्किएका थिए । सो पैसाले गत वर्ष नवलपरासीमा उनले जग्गा किनेका थिए ।

नेपाल फर्किएपछि माओवादी नेताको नाममा ठगी गर्ने योजना बनाएको प्रहरीको भनाइ छ । सञ्चारकर्मीसँग उनले निकै समय योजना बनाएर आफू यस्तो काममा लागेको बताए । 'काम भने तीन महिनाअघि मात्र सुरु गरेको हुँ,' उनले भने ।

पोखरेलले अन्य एक दर्जनभन्दा बढी व्यवसायीसँग पनि पैसा मागिसकेको प्रहरीले जनाएको छ । एभरेस्ट बैंक, मेगा बैंक, बैंक अफ काठमाडौं, नेपाल बंगलादेश बैंक, नेपाल इन्भेस्टमेन्ट बैंक, लुम्बिनी बैंक, जनता बैंक, त्रिवेणी विकास बैंक, नारायणी फाइनान्स, बुटवल फाइनान्स, त्रिवेणी विकास बैंक, साइन डेभलपमेन्ट बैंकका सिइओ तथा बुटवल सिमेन्ट, हिल टेक कम्पनी, नान्स होटललगायत निजी कम्पनीबाट पनि उनले पैसा मागेको तर लिन भने नभ्याएको प्रहरीको भनाइ छ । टेलिफोन डाइरेक्ट्रीबाट बैंक र विभिन्न कम्पनीको टेलिफोन नम्बर लिएर व्यापारीसँग पैसा माग्ने गरेको पोखरेलले प्रहरीलाई बताएका छन् ।

पोखरेलले ठगीमा फरकफरक सिमकार्ड प्रयोग गर्ने गरेको महानगरीय प्रहरी अपराध महाशाखाका डिएसपी हृदय थापाले बताए । सापकोटाले नेत्रविक्रम चन्दको नाममा बैंक अफ काठमाडौंमा खाता खोलेका थिए भने हिमाल शर्माको नाममा नबिल बैंकको भैरहवा शाखामा खाता खोलेका थिए । । गणित विषयमा स्नातकसम्मको अध्ययन गरेका पोखरेल यसअघि पनि ०५८ मा पक्राउ परेको प्रहरीले बताएको छ ।

नेताको आवाजसमेत दुरुस्त गरेर बैंकका उच्च अधिकारीसँग पैसा माग्ने गरेको प्रहरी अनुसन्धानमा खुलेको छ । किस्ट बैंकका सिइओ ज्ञवालीले नेता विप्लवकै आवाजमा सापकोटाले आफूसँग कुरा गरेको बताए । माओवादी नेताहरूलाई व्यापारीहरूले सहयोग गर्ने थाहा पाएर आफूलेे यस्तो जुक्ति अपनाएको पोखरेलको भनाइ छ । 'ठगी गर्दा पनि मैले कसैलाई धम्क्याउने गरेको छैन, विश्वासमा लिएर पैसा लिएको हुँ,' उनले सञ्चारकर्मीसँग भने ।

प्रहरीका अनुसार त्यसरी ठगी गरेको पैसाबाट उनले घर र गाडी किनिसकेका छन् । पोखरेलले चढ्ने पिकान्टो गाडी पनि प्रहरीले नियन्त्रणमा लिएको छ । प्रहरीले माओवादी नेताको नाममा उनले खोलेका बैंकखाता रोक्का गरेको छ । बैंकलाई झुक्याउन बनाइएको नेताहरूको नागरिकतामा ठेगाना भने पोखरेलले वास्तविक नै राखेका छन् । विप्लवको ठेगाना हापुरे रोल्पा राखिएको छ भने हिमाल शर्माको ठेगानामा चितपोखरा बाग्लुङ राखिएको छ ।

एसएसपी नेपालले निकै चतुर तरिकाले ठग्ने गरेको र प्रहरीले थाहा पाउनुअगाडि नै भाग्ने योजना बनाएको बताए । किस्ट बैंकका सिइओ ज्ञवालीले भने टेलिकमले जथाभावी सिमकार्ड दिने गरको र बैंकले पनि नागरिकताको आधिकारिता परीक्षण नगर्ने भएकाले आफूहरू ठगिएको बताएका छन् । 'मेरै बैंकमा पनि कतिपयले नक्कली नागरिकतामा खाता खोलेका हुन सक्छन्, यसमा अब अनुसन्धान गरिनुपर्छ,' उनले भने