सहीदका छोरा बेरोजगार

गोपाल झापाली

पञ्चायती शासनका बिरुद्ध आन्दोलन गरेका कारण हत्या गरिएका झापा चारपाने ५ का सहीद रामनाथ दहालको परिवारले जिविकाका लागि सरकारबाट सहयोग नपाएको गुनासो गरेको छ ।

सहीद दहालकी पत्नी र कान्छा छोरा दिपेन्द्र ।

हाल चारपाने ५ को लालमाटीमा आफन्तको घरमा बस्दै आएकी सहीद दहालकी जेठी श्रीमती जानुकाले केहि वर्षअघि सरकारबाट केहि राहत पाए पनि जिविका चलाउन सहायता नभएको बताईन् । भएका २ भाइ छोराहरु बेरोगार भएकाले आफ्नो बुढ्यौलीमा समस्या परेको बताईन् । उनले भनिन् -’भएका २ भाइ छोरा नै कामबिना घरमैमा बसेर जसोतसो खेती गर्दै आएका छन्, केहि दिगो काम भए जिउन अलिक सजिलो हुन्थ्यो होला ।’श्रीमानले बनाएको पुरानो घर भत्किन थालेकाले बस्न समस्या भएको उनले बताईन् । पुरानो घरमा ताल्चा लगाएर हाल आफु छोरीको घरमा बस्दै आएको उनले बताईन् । २०२९ सालमा गोली हानेर रामनाथ दहालको हत्या गरिँदा गर्भमा नै रहेका कान्छा छोरा दिपेन्द्रले आफु बिरामी हुँदासमेत उपचारमा समस्या हुने गरेको बताए । पटकपटक बिभिन्न दलका नेता तथा मन्त्रीहरुलाई सानोतिनो रोजगारीका लागि आग्रह गरे पनि कतैबाट सहयोग नपाएको उनले बताए । उनले भने -’केपी ओली, राधाकृष्ण मैनाली, सिपि मैनाली लगायतका नेताहरु बुवासँगै राजनीति गर्नुहुन्थ्यो अरे, समस्याबारे उहाँहरुलाई बताएँ तर कतै सुनुवाई भएन ।’

श्रीमानले बनाएको पुरानो घर देखाउँदै सहीद पत्नी ।

दुर्घटनामा परेर घरैमा बसिरहेका दिपेन्द्रले यसअघि समेत उपचारमा सहयोग गर्न बिभिन्न निकायमा माग गरेको बताए । सहीदका नाममा राजनीति गर्नेले बिभिन्न फाईदा लिएको जनाउँदै त्यस्ता ब्यक्तिहरुका कारण वास्तविक सहीद परिवार मर्कामा परेको उनको भनाई छ ।

पञ्चायती ब्यबस्थाबिरुद्ध आन्दोलन गर्दा पक्राउ परेका रामनाथ दहाललाई राजद्रोहको मुद्दा लगाई जेल चलान गरिएको थियो । झापा कारागारबाट सरुवा गर्ने क्रममा इलामको सुखानीमा पुर्‍याएर उनीसँगै कृष्ण कुइँकेल, बिरेन राजवंशी, नेत्र घिमिरे र नारायण श्रेष्ठलाई गोली हानेर हत्या गरिएको थियो ।