क्यानेडियन गायक ब्रायन एडम्ससँग नेपालका १९७४ एडी, नमस्ते ब्यान्ड र मंगोलियन हर्टले गीत प्रस्तुत गर्ने भएका छन्। आगामी फागुन ७ का दिन दशरथ रंगशालामा हुने ब्रायन एडम्सको कन्सर्टमा तीन वटै ब्यान्डले करिब आधा घन्टाको प्रस्तुति दिनेछन्। १९७४ एडीले 'यो मन त मेरो नेपाली', 'पहिलो जुनी', 'पिँजडाको सुगा' र 'सम्बोधन' बोलका गीत प्रस्तुत गर्नेछ।
'अन्तर्राष्ट्रिय गायक नेपालमा आउनु नै गौरवको कुरा हो। त्यसमाथि नेपाली ब्यान्डले उनको स्वागत गर्दैछ। त्यो सकारात्मक कुरा हो,' ब्यान्डका सदस्य मनोज केसीले भने। यही कन्सर्टका लागि मंगोलियन हर्टका राजु लामा अमेरिकादेखि काठमाडौं आउँदैछन्। ब्यान्डले कन्सर्टमा ३ वटा गीत प्रस्तुत गर्नेछ। नमस्ते ब्यान्डका ईश्वर गुरूङले यसपटक कन्सर्टमा जापानी कलाकारसँग प्रस्तुति दिनेछन्।
हरेक ब्यान्डलाई स्टेजमा उपस्थित हुन कम्तीमा १५ मिनेट लाग्ने भएकोले थोरै र उत्कृष्ट ब्यान्ड छनोट गरिएको आयोजक सीमान्त गुरुङले जनाए।
'नेपालमा राम्रा कलाकार थुप्रै छन्। तर समय अभावले सबैलाई समेट्न सकेनौं,' सीमान्तले भने। छनोटअघि ब्रायन एडम्सका म्यानेजरले तीनवटै समूहका गीत सुनेको उनले बताए। ब्रायनका म्यानेजर र आयोजकको सहकार्यमा नेपाली ब्यान्ड छनोट भएको हो।
No comments:
Post a Comment
आफ्नो अमूल्य राय, सुझाव तथा टिप्पणीहरु यहाँ लेख्नुहोला...▼ Please leave your Comments here...▼ ...