विर्तामोड, १८ माघ ÷ माओवादी सभासद् धर्मशीला चापागाईं सञ्चार जगतबाट बहिष्कृत हुने भएकी छन् । पत्रकारमाथि दुव्र्यवहार गर्ने उनलाई सञ्चार जगतले तीन महिनासम्म बहिष्कार गर्ने घोषणा गरेको छ ।
नेपाल पत्रकार महासंघ झापाका अध्यक्ष एवम् जन–संसद् दैनिकका सम्पादक मोहन काजीमाथि चापागाईंले मंगलबार दुव्र्यवहार गरेकी थिइन् । जिल्ला विकास समिति कार्यालयको स्थानीय विकास अधिकारीको कार्यकक्षमा उनले काजीमाथि अपशब्द प्रयोग गर्दै सिंगै सञ्चारजगतमाथि लाञ्छना लगाएकी थिइन् ।
सुनसरीको हाँसपोसामा झापा राजगढ–५ का चन्द्रलाल रिजालले एमाओवादी अध्यक्ष पुष्पकमल दाहालमाथि आक्रमण प्रयास गरेको घटनाको विषयमा प्रकाशित समाचारप्रति आक्रोश पोख्दै चापागाईंले दुव्र्यवहार गरेकी हुन् ।
माओवादी सहिद परिवारले अध्यक्ष पुष्पकमल दाहालमाथि गर्न खोजेको आक्रमणबारे संचारमाध्यमले समाचार प्रकाशन–प्रशारण गरेका थिए । त्यसबेला सभासद् चापागाईंले आक्रमणकारीलाई रोकेको तस्वीर समेत सार्वजनिक भएको थियो । उनले त्यही आक्रोशमा संचारजगतमाथि नै लाञ्छना लगाएकी हुन् ।
उनले अशिष्ट शैलीमा पत्रकारमाथि गरेको दुव्र्यवहारविरुद्ध झापाका सञ्चारसम्वद्ध संघ–संगठनले कडा प्रतिक्रिया व्यक्त गर्दै उनलाई बहिष्कार गर्ने घोषणा गरेका हुन् ।
पत्रकार महासंघ झापा, प्रेस चौतारी, प्रेस युनियन, क्रान्तिकारी पत्रकार संघ, मेची बोर्डर जर्नालिष्ट एशोसिएशन, आदिबासी जनजाति पत्रकार संघ र इन्सेकले संयुक्त विज्ञप्तिमार्फत घटनाको निन्दा र भत्र्सना गरेका छन् ।
महासंघको आकस्मिक विस्तारित बैठकले घटनालाई गम्भीरतापूर्वक लिँदै चापागाईंलाई तीन महिनासम्म बहिष्कार गर्ने निर्णय गरेको हो । बैठकमा महासंघ पदाधिकारी तथा सदस्यहरु, विभिन्न सञ्चारसम्वद्ध संघ–संगठनका प्रतिनिधि तथा अग्रज पत्रकारहरुको उपस्थिति थियो ।
बैठकपछि जारी संयुक्त विज्ञप्तिमा तीन महिनासम्म चापागाईंको अन्तरवार्ता र समाचार प्रकाशन–प्रशारण नगर्न सम्पूर्ण सञ्चारकर्मीलाई आह्वान गरिएको छ । विज्ञप्तिमा महासंघ झापा सचिव गणेश पोखरेल, युनियन अध्यक्ष भीम नेम्बाङ, चौतारी सचिव सुव्रत न्यौपाने, क्रान्तिकारीका सचिव प्रेम आचार्य, मेची बोर्डरका अध्यक्ष मुक्ति पौडेल, आदिबासी जनजाति पत्रकार संघका सहसचिव विशाल नेम्बाङ र इन्सेकका अर्जुन बस्नेतले हस्ताक्षर गरेका छन् ।

No comments:
Post a Comment
आफ्नो अमूल्य राय, सुझाव तथा टिप्पणीहरु यहाँ लेख्नुहोला...▼ Please leave your Comments here...▼ ...