प्रधानमन्त्री पदका लागि एकीकृत नेकपा माओवादीका अध्यक्ष पुष्पकमल दहाल प्रचण्ड, नेपाली कांग्रेसका संसदीय दलका नेता रामचन्द्र पौडेल, एमाले अध्यक्ष झलनाथ खनाल र मधेसी जनअधिकार फोरम लोकतान्त्रिकका अध्यक्ष विजयकुमार गच्छदारको उम्मेदवारी परेको छ ।
प्रधानमन्त्रीको निर्वाचन बिहीबार हुनेछ । संसद सचिवालयमा बुधबार दर्ता गरिएको प्रचण्डको मनोनयनमा उपाध्यक्ष डा. बाबुराम भट्टराई प्रस्तावक र अर्का उपाध्यक्ष नारायणकाजी श्रेष्ठ प्रकाश समर्थक रहनु भएको छ ।
यसैगरी कांग्रेस नेता पौडेलको प्रस्तावकमा प्रकाशमान सिँह र समर्थकमा रामकृष्ण यादव हुनुहुन्छ । यस्तै खनालको प्रस्तावकमा प्रमुख सचेतक भिम आचार्य र समर्थकमा नेता रामचन्द्र झा हुनुहुन्छ ।
यसैगरी गच्छदारको प्रस्तावकमा सद्भावना पार्टीका सहअध्यक्ष लक्ष्मणलाल कर्ण र समर्थकमा तराई मधेस लोकतान्त्रिक पार्टीका सहमहामन्त्री जितेन्द्र सोनल रहनु भएको छ ।
उम्मेदवार दर्तापछि चारै जना उम्मेदवारले आफु विजयी हुने दावी गरेका छन् । यद्यपी अहिलेसम्म कुनै पनि उम्मेदवारको पक्षमा प्रधानमन्त्रीमा निर्वाचित हुनका लागि आवश्यक ३ सय १ सभासदको समर्थन देखिएको छैन ।
२३९ सभासद रहेको माओवादीका उम्मेदवारलाई साना सात दलको समर्थन छ भने कांग्रेसको ११४ सभासद छ । यसैगरी एमालेको १०७ सभासद छ ।
८१ सभासद रहेको संयुक्त लोकतान्त्रिक मधेसी मोर्चाका उम्मेदवार गच्छदारलाई साना १७ दलले समर्थन गर्ने आश्वासन दिएका छन् । साना दलहरुको समर्थन पाएको अवस्थामा गच्छदारले १ सय ४२ मत पाउने मोर्चाको ठम्याई छ । यस्तो अवस्थामा बिहीबारकै निर्वाचनबाट प्रधानमन्त्री चयन हुने सम्भावना निकै कम छ ।
कसरी अगाडि बढ्छ निर्वाचन प्रक्रिया
विहीबार अपराहृन एक बजे बस्ने व्यवस्थापिका संसद बैठकमा निर्वाचन हुनेछ । बैठकको सुरुमा उम्मेदवारहरुले आफूले उम्मेदवारी दिनुको कारणबारे आफ्नो धारणा राख्ने छन् । उम्मेदवारको धारणापछि प्रस्तावक र समर्थकहरुलाई बोल्ने समय दिइने छ । त्यसपछि उम्मेदवारहरुका सम्बन्धमा सामूहिक छलफल हुने छ ।
छलफलमा उम्मेदवारी नदिएका दलका प्रतिनिधिहरुले पनि धारणा राख्न पाउनेछन् । त्यसपछि सभामुख सुवास नेम्वाङले उम्मेदवारहरुलाई उम्मेदवारी फिर्ताको समय दिनुहुने छ । विहीबार नै सबैको एकैपटक मतविभाजन गर्ने कार्यक्रम तोकिएको छ ।विहीबारको निर्बाचनबाट पनि परिणाम नआए २२ गते पुनः सबै उम्मेदवारबीच प्रतिस्पर्धा गराइनेछ ।
२२ गते पनि उम्मेदवारहरुले बहुमत पुर्याउन नसके धेरै मत ल्याउने दुई उम्मेदवारबीच २३ गते पुनः मतदान गराइने छ । त्यसबाट पनि कुनै उम्मेदवारले बहुमत पुर्याउन नसके निर्बाचन प्रक्रिया नै अन्त्य हुनेछ ।
संशोधित नियमावलीअनुसार निर्बाचनमा तटस्थ बस्न बन्देज गरिएकोले दोस्रोपटकको निर्बाचनबाट मुलुकले नयाँ प्रधानमन्त्री पाउने विश्वास लिइएको छ ।
मनोनयन दर्ता गर्दै प्रधानमन्त्रीका दावेदारहरु
No comments:
Post a Comment
आफ्नो अमूल्य राय, सुझाव तथा टिप्पणीहरु यहाँ लेख्नुहोला...▼ Please leave your Comments here...▼ ...