गर्भ तुहाउने मेडिकल संचालक पक्राउ

सिद्धराज राई, धनकुटा, माघ १८ - आठ महिनाको गर्भ तुहाउने प्रयास गर्दा आमा र बच्चाको मृत्यु भएको आरोपमा धनकुटाको हिले बजारमा रहेको कृष्ण मेडिकल हलका सञ्चालक सत्यनारायण यादव र उनका श्रीमति चौरासीदेवी यादवलाई प्रहरीले पक्राउ गरेको छ। उनीहरुलाई ज्यान मार्ने उद्योग अर्न्तगत मुद्दा चलाउने तयारी प्रहरीले गरेको छ।

गएको माघ १४ गते उपचार गर्न कृष्ण मेडिकल हल पुगेका चुङमाङ-१ उत्तरपानीका ३२ बर्षिय लक्ष्मी मोक्तान तामाङ र उनको पेटमा रहेको ८ महिनाको बच्चाको माघ १५ गते मृत्यु भए पछि उनीहरुलाई पक्राउ गरिएको हो। मृत्तकका बुबा विष्णु तामाङले मेडिकल हलले बच्चा तुहाउने औषधी दिएको कारण छोरीको मृत्यु भएको किटानी उजुरी दिए पछि प्रहरीले मेडिकल हल सञ्चालक यादव दम्पत्तिलाई पक्राउ गरेको जिल्ला प्रहरी कार्यालयले बताएको छ।

१२ बर्ष अगाडि सिराहबाट धनकुटाको हिले आएर औषधि व्यवसाय गर्दै आएका यादव दम्पत्तीलाई हाल जिल्ला प्रहरी कार्यालयको हिरासतमा राखिएको छ।  उनीहरुको बयान लिने तयारी भइरहेको प्रहरी निरीक्षक भद्रमान मोतेले बताए। 

तर मेडिकल हल सञ्चालक सत्यनारायण यादव भने वान्ता गरेर आएका विरामी तामाङलाई सामन्य उपचार मात्रै गराएको र गर्भपतन हुने औषधी नदिएको बताए। प्रहरी हिरासतमा रहेका यादवले नागरिक सम्वाददातासँग भने, 'सर मैले गल्ती गरेको छैन। मलाई फसाईयो।' औषधीको नाम समेत पढ्न नजान्ने आफ्नी श्रीमतीलाई समेत पक्राउ गरेको उनले बताए। 

तर मृत्तक तामाङका बुबा विष्णु तामाङ मेडिकल हलका सञ्चालक यादबले विरामीलाई गलत औषधी दिएको कारण मृत्यु भएको बताए। @ Nagariknews